ନୂଆଦିଲ୍ଲୀ : ପାଞ୍ଚଟି ରାଜ୍ୟରେ କଂଗ୍ରେସ ଦଳର ପରାଜୟ ପରେ କଂଗ୍ରେସର ବରିଷ୍ଠ ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ କପିଲ ସିବଲ କଂଗ୍ରେସ ଏବଂ ଗାନ୍ଧୀ ପରିବାର ଉପରେ ସିଧାସଳଖ ଆକ୍ରମଣ କରିଛନ୍ତି। ଏକ ଜାତୀୟ ଇଂରାଜୀ ଖବରକାଗଜକୁ ଦେଇଥିବା ଏକ ସାକ୍ଷାତକାରରେ କପିଲ ସିବଲ କହିଛନ୍ତି ଯେ ବିଧାନସଭା ନିର୍ବାଚନରେ ଦଳର ପରାଜୟ ଏବଂ ସୋନିଆ ଗାନ୍ଧୀଙ୍କ ନେତୃତ୍ୱରେ କଂଗ୍ରେସ କାର୍ଯ୍ୟକାରିଣୀ (ସିଡବ୍ଲୁସି) ଭରସା ପ୍ରକଟ କରିବା ନେଇ ସେ ଆଶ୍ଚର୍ଯ୍ୟ ନୁହନ୍ତି ।କପିଲ କହିଛନ୍ତି ଯେ, ଏହା ସଠିକ ସମୟ । ଗାନ୍ଧୀ ପରିବାର କଂଗ୍ରେସର ନେତୃତ୍ୱରୁ ହଟିବା ଦରକାର । ଅନ୍ୟ କାହାକୁ ନେତୃତ୍ୱ ପାଇଁ ସୁଯୋଗ ଦେବା ଆବଶ୍ୟକ । ଏହାସହ ଦଳର ମାନସମନ୍ଥନ ଆଲୋଚନାକୁ ସେ କଟାକ୍ଷ ମଧ୍ୟ କରିଛନ୍ତି ।
ସେ କହିଛନ୍ତି ଯେ ସିଡବ୍ଲୁସି ବାହାରେ ଅଧିକାଂଶ ନେତାଙ୍କର ସମ୍ପୂର୍ଣ୍ଣ ଭିନ୍ନ ଦୃଷ୍ଟିକୋଣ ରହିଛି । ଦଳ ୮ ବର୍ଷ ହେଲା ହାରୁଛି । ହେଲେ କାରଣ ଜାଣିପାରୁ ନାହିଁ । ଜି୨୩ ନେତା ୨୦୨୦ରେ ସୋନିଆ ଗାନ୍ଧୀଙ୍କୁ ଭେଟିଥିଲେ । ଦଳରେ ଆମୂଳଚୂଳ ପରିବର୍ତ୍ତନ ପାଇଁ ଦାବି କରିଥିଲେ । ଗାନ୍ଧୀ ପରିବାର ନୂଆ ନେତାଙ୍କ ପାଇଁ ବାଟ ଫିଟାଇବା ଆବଶ୍ୟକ । କ୍ଷମତା ଗାନ୍ଧୀ ପରିବାର ଏବେ ନିଜ ହାତରେ ରଖିବା ଠିକ୍ ନୁହେଁ ।
ଦଳର ନେତୃତ୍ୱ ଉପରେ ଏକ ପ୍ରଶ୍ନର ଉତ୍ତରରେ ସିବଲ କହିଛନ୍ତି, “ପାଞ୍ଚ ରାଜ୍ୟରେ ବିପର୍ଯ୍ୟୟ ପରେ ନେତୃବର୍ଗ (ଗାନ୍ଧୀ ପରିବାର) ଏହି ପଦ ଅନ୍ୟ କାହାକୁ ଛାଡ଼ିଦେବା ଉଚିତ ଏବଂ ଯିଏ ଏହି ପଦରେ ନିର୍ବାଚିତ ହେବେ ସେହି ବ୍ୟକ୍ତିଙ୍କୁ ପ୍ରଦର୍ଶନ କରିବାକୁ ଦିଅନ୍ତୁ। ” ସିବଲ ଆହୁରି କହିଛନ୍ତି ଯେ, “ଯଦି ଆପଣ ଚାହାଁନ୍ତି, ସିଡବ୍ଲୁସି ବାହାରେ ଏକ କଂଗ୍ରେସ ଅଛି, ସେମାନଙ୍କ ମତାମତ ଶୁଣନ୍ତୁ । ଆମ ପରି ଅନେକ ନେତା ଅଛନ୍ତି ଯେଉଁମାନେ ସିଡବ୍ଲ୍ୟୁସିରେ ନାହାଁନ୍ତି କିନ୍ତୁ କଂଗ୍ରେସଠାରୁ ସେମାନଙ୍କ ଦୃଷ୍ଟିକୋଣ ଭିନ୍ନ ରହିଛି। ଆମେ ସିଡବ୍ଲ୍ୟୁସିରେ ନ ଥିବାରୁ ଏହା ଆମ ପାଇଁ କଣ କିଛି ଗୁରୁତ୍ୱ ବହନ କରୁନାହିଁ? ସିଡବ୍ଲ୍ୟୁସି ସମଗ୍ର ଭାରତରେ କଂଗ୍ରେସ ଦଳର ପ୍ରତିନିଧିତ୍ୱ କରୁଛି ବୋଲି ମୁଁ ଭାବୁ ନାହିଁ। ଗାନ୍ଧୀ ପରିବାରର ଇସ୍ତଫା ପ୍ରଶ୍ନ ଉପରେ କପିଲ ସିବଲ କହିଛନ୍ତି, ମୁଁ ଅନ୍ୟମାନଙ୍କ ବିଷୟରେ କିଛି କହିପାରିବି ନାହିଁ। ଏହା କେବଳ ମୋର ବ୍ୟକ୍ତିଗତ ମତ । ଅନ୍ତତଃ ପକ୍ଷେ ମୁଁ ‘ସବ୍ କି କଂଗ୍ରେସ(ସଭିଙ୍କ କଂଗ୍ରେସ)’ ଚାହୁଁଛି । ଆଉ କେତେକ ଚାହାଁନ୍ତି ‘ଘର କି କଂଗ୍ରେସ’ । ମୁଁ ନିଶ୍ଚିତ ଭାବେ ‘ଘର କି କଂଗ୍ରେସ’ ଚାହେଁ ନାହିଁ । ମୋର ଶେଷ ନିଶ୍ୱାସ ପର୍ଯ୍ୟନ୍ତ ମୁଁ ‘ସବ୍ କି କଂଗ୍ରେସ’ ପାଇଁ ଲଢିବି। ‘ସବ୍ କି କଂଗ୍ରେସ’ର ଅର୍ଥ କେବଳ ଏକାଠି ହେବା ନୁହେଁ, ବରଂ ଭାରତର ସେହି ସମସ୍ତ ଲୋକଙ୍କୁ ଏକାଠି କରିବା ଯେଉଁମାନେ ବିଜେପିକୁ ଚାହୁଁ ନାହାଁନ୍ତି। ”
ପାଞ୍ଚ ରାଜ୍ୟରେ ବିପର୍ଯ୍ୟୟ ପରେ ଦୁଇ ଦିନ ତଳେ ଅନୁଷ୍ଠିତ କଂଗ୍ରେସ ସିଡବ୍ଲ୍ୟୁସି ବୈଠକରେ ସୋନିଆ ଗାନ୍ଧୀ ସଭାପତି ପଦ ବଜାୟ ରଖିବା ପାଇଁ ନିଷ୍ପତ୍ତି ହୋଇଥିଲା । ସୋନିଆଙ୍କ ସହ ରାହୁଲ ଓ ପ୍ରିୟଙ୍କା ଗାନ୍ଧୀ ଭଦ୍ରା ପଦ ଛାଡ଼ିବାକୁ ପ୍ରସ୍ତାବ ଦେଇଥିଲେ ମଧ୍ୟ ଏହାକୁ ଗ୍ରହଣ କରାଯାଇନଥିଲା ।ସିବଲ ଆହୁରି କହିଛନ୍ତି ଯେ, ଦଳର ପରାଜୟକୁ ନେଇ ସେ ଚିନ୍ତିତ ଅଛନ୍ତି । ସିଡବ୍ଲୁସି ବୈଠକରେ ପୁଣି ସୋନିଆଙ୍କ ନେତୃତ୍ୱରେ ଦଳ ଚାଲିବ ବୋଲି ନିଷ୍ପତ୍ତି ହୋଇଛି । କିନ୍ତୁ ଅନେକନେତାଙ୍କ ମତ ଅଲଗା । ସିଡବ୍ଲୁସି ବାହାରେ ବି ଆଉ ନେତା ଅଛନ୍ତି । ସେ ନିଜେ ସିଡବ୍ଲୁସିରେ ନାହାଁନ୍ତି । ଦେଶରେ ଅନେକ କଂଗ୍ରେସ ନେତା ଅଛନ୍ତି । କେବଳ ସିଡବ୍ଲୁସି ସବୁ ନୁହେଁ । କେରଳ, ଜମ୍ମୁ କାଶ୍ମୀର, ଗୁଜୁରାଟ, ଉତ୍ତର ପ୍ରଦେଶର ଅନେକ ନେତା ସିଡବ୍ଲୁସିର ମତ ସହ ଭିନ୍ନ ମତ ରଖିଥାନ୍ତି । ସେ ନିଜେ କଂଗ୍ରେସରେ ପରିବାରବାଦ ଚାହୁଁନାହାଁନ୍ତି । ସେ ସମସ୍ତଙ୍କ କଂଗ୍ରେସ ପାଇଁ ଲଢିବେ ବୋଲି କହିଛନ୍ତି ।
