ମାଲକାନଗିରି ସୀମାନ୍ତରେ ମାଓବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ଗୁଳି ବିନିମୟ, ବିପୁଳ ମାଓ ସାମଗ୍ରୀ ଜବତ
ମାଲକାନଗିରି: ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡର ଗରିଆବନ୍ଧ ଜିଲ୍ଲାରେ ମାଓ ଦମନ ପାଇଁ ସର୍ଚ୍ଚ ଅପରେସନ ବେଳେ ମାଓବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ଗୁଳିବିନିମୟ ଘଟିଛି। ଏହି ଗୁଳି ବିନିମୟରେ କେହି ମୃତାହାତ ହୋଇ ନ ଥିବା ବେଳେ ଗୁଳି ବିନିମୟ ପରେ ଯବାନ ମାନେ ସମ୍ପୃକ୍ତ ଅଞ୍ଚଳରେ ସର୍ଚ୍ଚ କରୁଥିବା ସମୟରେ ମାଓ କ୍ୟାମ୍ପକୁ ଠାବ କରି ତାହାକୁ ଧ୍ଵଂସ କରିଥିବା ଜଣାପଡ଼ିଛି।
ସୂଚନା ଅନୁଯାୟୀ, ଜିଲ୍ଲା ସୀମାନ୍ତ ଗରିଆବନ୍ଧ ଜିଲ୍ଲାର ଶୋଭା ପୋଲିସ ଷ୍ଟେସନ ଅନ୍ତର୍ଗତ ଭୀମାଟିକରା ଜଙ୍ଗଲରେ ସିଆରପିଏଫ ଓ ସ୍ଵତନ୍ତ୍ର ପୁଲିସ ବଳ ପକ୍ଷରୁ ମାଓ ଦମନ ପାଇଁ ସର୍ଚ୍ଚ ଅପରେସନ କରାଯାଉଥିବା ବେଳେ ଜଙ୍ଗଲରେ କ୍ୟାମ୍ପ କରି ଲୁଚି ରହିଥିବା ମାଓବାଦୀ ମାନେ ସୁରକ୍ଷା କର୍ମୀଙ୍କୁ ଦେଖି ଗୁଳି ଚାଳନା କରିଥିଲେ । ଯାହାର ପାଲଟା ଜବାବ ଦେଇଥିଲେ ସୁରକ୍ଷା ବଳ । ଉଭୟ ପକ୍ଷରୁ ପ୍ରାୟ ୩୦ ମିନିଟ ପର୍ଯ୍ଯନ୍ତ ଗୁଳି ବିନିମୟ ପରେ ଏହି ମାଓବାଦୀ ମାନେ ସୁରକ୍ଷା କର୍ମୀଙ୍କୁ ସାମ୍ନା କରି ନ ପାରି ପଛ ଘୁଞ୍ଚା ଦେଇ କ୍ୟାମ୍ପ ଛାଡି ଲୁଚି ପଳାଇଥିଲେ। ଏହି ଗୁଳି ବିନିମୟରେ କେହି ମୃତାହାତ ହୋଇ ନ ଥିବା ବେଳେ ଗୁଳି ବିନିମୟ ପରେ ଯବାନ ମାନେ ସମ୍ପୃକ୍ତ ଅଞ୍ଚଳରେ ସର୍ଚ୍ଚ କରୁଥିବା ସମୟରେ ମାଓ କ୍ୟାମ୍ପକୁ ଠାବ କରି ତାହାକୁ ଧ୍ଵଂସ କରିଥିଲେ । ସେହି କମ୍ପରୁ ବିପୁଳ ପରିମାଣର ନକ୍ସଲ ସାହିତ୍ୟ, ବିସ୍ଫୋରକ ସାମଗ୍ରୀ, ଗୋଟିଏ ବନ୍ଧୁକ, ମାଓ ପୋଷାକ ଓ ପୋଷ୍ଟର ସହ ନିତ୍ୟ ବ୍ୟବହାର ସାମଗ୍ରୀ ମାନ ଜବତ କରାଯାଇଥିବା ପୁଲିସ ପକ୍ଷରୁ ସୂଚନା ଦିଆଯାଇଛି ।