ଭୁବନେଶ୍ୱର: ପ୍ରକାଶ ପାଇଛି ସ୍ପେଶାଲ କ୍ରାଇମ ୟୁନିଟର ବାର୍ଷିକ ରିପୋର୍ଟ। ବଡ଼ ବଡ଼ ଠକ, ନିଶା ମାଫିଆ ଓ ବନ୍ଧୁକ ବେପାରୀଙ୍କୁ ବାନ୍ଧି ଅପରାଧୀଙ୍କ ନିଦ ହଜାଇ ଦେଇଛି ସ୍ପେଶାଲ କ୍ରାଇମ ୟୁନିଟ। ବର୍ଷକରେ ମୋଟ ୨୩ଟି ମାମଲା ରୁଜୁ ହୋଇଛି। ସେଥିମଧ୍ୟରୁ ୨୦ଟି ମାମଲାରେ ୫୨ ଅଭିଯୁକ୍ତଙ୍କୁ ଗିରଫ କରାଯାଇଛି। ସେମାନଙ୍କ ନିକଟରୁ ୩ କେଜି ୧ ଶହ ୮୬ ଗ୍ରାମ ବ୍ରାଉନସୁଗର, ୬୯୦ କେଜି ଗଞ୍ଜେଇ, ୫ଟି ବନ୍ଧୁକ, ୨୪ଟି ଗୁଳି ଜବତ କରାଯାଇଛି । ୮ କୋଟିରୁ ଉର୍ଦ୍ଧ୍ବ ଟଙ୍କାର ୯ଟି ଠକେଇ ମାମଲା ରୁଜୁ ହୋଇଛି। ୭ ମାମଲାରେ ୧୪ କୁଖ୍ୟାତ ଠକଙ୍କୁ ଗିରଫ କରାଯାଇଛି । ୧୦ଟି ନିଶା କାରବାର ମାମଲାରେ ୩୬ ମାଫିଆଙ୍କୁ ଗିରଫ କରାଯାଇଛି।
ଗତ ମାର୍ଚ୍ଚ ୨୬ରେ କୁଖ୍ୟାତ ବନ୍ଧୁକ ବେପାରୀ ସୁରଜ ପରିଡା ଓ ତପୁଧନ ବାରିକକୁ ଗିରଫ କରିଥିଲା ସ୍ପେଶାଲ କ୍ରାଇମ ୟୁନିଟ । ସେମାନଙ୍କ ନିକଟରୁ ସେମି ଅଟୋମେଟିକ ୫ଟି ବନ୍ଧୁକ ସହ ୨୪ ଗୁଳି ଜବତ କରାଯାଇଥିଲା । କାରକୁ ପିଛାକରି ୩ ଶହ କେଜି ଗଞ୍ଜେଇ ଧରି ଅପରାଧୀଙ୍କ ଛାତିରେ ଛନକା ପୁରାଇଦେଇଥିଲା ସ୍ପେଶାଲ କ୍ରାଇମ ୟୁନିଟ। ଆଗକୁ ଏଭଳି କାର୍ଯ୍ୟ ବଳବତ୍ତର ରହିବ ବୋଲି କହିଛନ୍ତି ପୋଲିସ କମିଶନର ସଞ୍ଜୀବ ପଣ୍ଡା ।
