ନୂଆଦିଲ୍ଲୀ : ଆଜି ଟୋକିଓରେ ଜାପାନର ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କ ଅନ୍ତିମ ସଂସ୍କାର ରାଷ୍ଟ୍ରୀୟ ମର୍ଯ୍ୟାଦାରେ କରାଯାଇଛି। ମୃତ୍ୟୁର ଦୁଇ ମାସ ପରେ ସରିଛି ତାଙ୍କ ଶେଷକୃତ୍ୟ। ଏଥିରେ ଭାରତ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯୋଗ ଦେଇଥିଲେ। ସିଞ୍ଜୋଙ୍କୁ ଶ୍ରଦ୍ଧାଞ୍ଜଳି ଦେବା ସହ ତାଙ୍କୁ ଅନ୍ତିମ ବିଦାୟ ଦେଇଥିଲେ ମୋଦୀ।ଜାପାନ ଇତିହାସରେ ଏହା ଦ୍ୱିତୀୟ ଘଟଣା ଯେଉଁଥିରେ ଜଣେ ରାଜନେତାଙ୍କ ରଜକୀୟ ଭାବେ ଅନ୍ତିମ ସଂସ୍କାର କରାଯାଇଛି। ଗତ ଜୁଲାଇ ୮ ତାରିଖରେ ଏକ ନିର୍ବାଚନୀ ରାଲିରେ ଭାଷଣ ଦେବା ସମୟରେ ସିଞ୍ଜୋ ଆବେଙ୍କୁ ଗୁଳି କରି ହତ୍ୟା କରାଯାଇଥିଲା। ତାଙ୍କ ଦେହାନ୍ତକୁ ଇତିମଧ୍ୟରେ ୨ ମାସ ବିତିଯାଇଥିବାବେଳେ ଆଜି ତାଙ୍କୁ ରାଜକୀୟ ମର୍ଯ୍ୟାଦା ଦେଇ ଅନ୍ତିମ ସଂସ୍କାର କରାଯାଇଛି। ସିଞ୍ଜୋ ଆବେଙ୍କ ରାଷ୍ଟ୍ରୀୟ ଅନ୍ତିମ ସଂସ୍କାରରେ ବିଶ୍ବର ୨୧୭ ଦେଶର ପ୍ରତିନିଧୀ ସାମିଲ ହୋଇଥିଲେ।
ସିଞ୍ଜୋ ଆବେଙ୍କ ଅନ୍ତିମ ସଂସ୍କାର ଦୁନିଆର ସବୁଠାରୁ ମହଙ୍ଗା ଅନ୍ତିମ ସଂସ୍କାର ମଧ୍ୟରୁ ଅନ୍ୟତମ। ଏଥିରେ ପ୍ରାୟ ୧.୮ ବିଲିୟନ ୟେନ୍ ଅର୍ଥାତ୍ ୯୭ କୋଟି ଟଙ୍କା ଖର୍ଚ୍ଚ କରାଯାଇଛି। ଏହା ସରକାରୀ ପାଣ୍ଠିରୁ ଖର୍ଚ୍ଚ ହୋଇଛି। ଏବେ ଆପଣଙ୍କ ମନରେ ପ୍ରଶ୍ନ ଉଠିବା ସ୍ବଭାବିକ ଯେ ଏତେ ଟଙ୍କା ଖର୍ଚ୍ଚ ପୁଣି ଅନ୍ତିମ ସଂସ୍କାରରେ । ଆଉ କଣ ପାଇଁ ଏତେ ଟଙ୍କା ଖର୍ଚ୍ଚ ହୋଇଗଲା ତାହାକୁ ନେଇ ମଧ୍ୟ ଲୋକଙ୍କ ମନରେ ପ୍ରଶ୍ନ ଉଠୁଥିବ। ତେବେ ସିଞ୍ଜୋ ଆବେଙ୍କୁ ଚଳିତ ବର୍ଷ ଜୁଲାଇ ୮ ରେ ହତ୍ୟା କରାଯାଇଥିଲା। ଏହା ପରେ ପରିବାର ୧୫ ଜୁଲାଇରେ ପରମ୍ପରା ଅନୁଯାୟୀ ତାଙ୍କ ଶବଦାହ କରିଥିଲେ। କିନ୍ତୁ କରାଯାଇଥିବା ଅନ୍ତିମ ସଂସ୍କାର ରାଜକୀୟ ମର୍ଯ୍ୟାଦା ସହ କରାଯାଇଛି। ଆବେଙ୍କ ଚିତାଭସ୍ମକୁ ଶ୍ରଦ୍ଧାଞ୍ଜଳି ଭାବରେ ରଖାଯାଇଥିଲା। ଆବେଙ୍କ ଅନ୍ତିମ ବିଦାୟ ପାଇଁ ବିଶ୍ବର ୨୧୭ ଦେଶରୁ ୭୫୦ ରୁ ଅଧିକ ପ୍ରତିନିଧୀ ପହଞ୍ଚିଥିଲେ। ଏଥି ସହିତ ମୋଟ୍ ୪୫୦୦ ରୁ ଅଧିକ ବିଭିନ୍ନ ଦେଶର ପ୍ରତିଷ୍ଠିତ ଲୋକ ମଧ୍ୟ ପହଞ୍ଚିଥିଲେ।
ପ୍ରଥମେ ଆବେଙ୍କ ଚିତାଭସ୍ମକୁ ଏକ ବଡ଼ ହଲରେ ରଖାଯାଇଥିଲା। ଏହା ପରେ ତାଙ୍କ ପରିବାର ସଦସ୍ୟ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ତା’ପରେ ଜାପାନର ପ୍ରଧାନମନ୍ତ୍ରୀ ଏବଂ ଅନ୍ୟ ଦେଶର ବିଦେଶୀ ପ୍ରତିନିଧୀମାନେ ପୁଷ୍ପମାଲ୍ୟ ଅର୍ପଣ କରି ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ଅନ୍ତିମ ସଂସ୍କାରରେ ଆମେରିକାର ଉପରାଷ୍ଟ୍ରପତି କମଲା ହାରିସ୍, ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ,ତାଇୱାନ, ଚୀନ୍, ଅଷ୍ଟ୍ରେଲିଆ, ଶ୍ରୀଲଙ୍କାର ପରି ବିଭିନ୍ନ ଦେଶର ନେତାମାନେ ମଧ୍ୟ ଏଥିରେ ଭାଗ ନେଇଥିଲେ। ଏମାନଙ୍କ ମଧ୍ୟରେ ଅଧିକାଂଶ ଦେଶରେ ରାଷ୍ଟ୍ରପତି, ଉପ-ରାଷ୍ଟ୍ରପତି କିମ୍ବା ପ୍ରଧାନମନ୍ତ୍ରୀ ରହିଛନ୍ତି।
ଗଣମାଧ୍ୟମର ରିପୋର୍ଟ ଅନୁଯାୟୀ, ସିଞ୍ଜୋ ଆବେଙ୍କ ରାଷ୍ଟ୍ରୀୟ ଅନ୍ତିମ ସଂସ୍କାରରେ ଖର୍ଚ୍ଚ ହୋଇଥିବା ୯୭ କୋଟିରୁ ସବୁଠୁ ଅଧିକ ଅର୍ଥ ବିଦେଶୀ ଅତିଥିଙ୍କ ସୁରକ୍ଷା ଏବଂ ସେମାନଙ୍କ ରହିବା ପାଇଁ ବ୍ୟବସ୍ଥା କରାଯାଇଛି। VVIP- ଶ୍ରେଣୀର ଅତିଥିମାନଙ୍କୁ ସୁରକ୍ଷା ଦେବା ପାଇଁ ୨୦,୦୦୦ ରୁ ଅଧିକ ଜାପାନୀ ସୁରକ୍ଷା କର୍ମୀ ନିୟୋଜିତ ହୋଇଥିଲେ। ଏକାସାଙ୍ଗରେ ବହୁ ସଂଖ୍ୟକ VVIP ବିମାନର ଆଗମନ ହେତୁ ଅନେକ ଅସ୍ଥାୟୀ ବିମାନ ବନ୍ଦର କରାଯାଇଥିଲା। ବିଭିନ୍ନ ସହରରେ ଅବତରଣ କରିବା ପାଇଁ ବିଦେଶୀ ଅତିଥିମାନଙ୍କ ପାଇଁ ବ୍ୟବସ୍ଥା କରାଯାଇଥିଲା। ସେଠାରୁ ତାକୁ ହେଲିକପ୍ଟର ଯୋଗେ ଟୋକିଓକୁ ଅଣାଯାଇଥିଲା । କୁହାଯାଉଛି ଯେ ସିଞ୍ଜୋ ଆବେଙ୍କ ଅନ୍ତିମ ସଂସ୍କାରରେ ରାଣୀ ଏଲିଜାବେଥ୍ ଦ୍ୱିତୀୟଙ୍କ ଅନ୍ତିମ ସଂସ୍କାରରେ ଖର୍ଚ୍ଚ ହୋଇଥିବା ଅର୍ଥଠାରୁ ଅଧିକ ଅଟେ। ନିକଟରେ ଏଲିଜାବେଥଙ୍କ ଅନ୍ତିମ ସଂସ୍କାର କରାଯାଇଥିଲା। ଏଥିରେ ପ୍ରାୟ ୭୩.୭ କୋଟି ଟଙ୍କା ଖର୍ଚ୍ଚ କରାଯାଇଥିଲା। ସରକାର କହିଛନ୍ତି ଯେ ଆବେଙ୍କ ରାଜ୍ୟ ଅନ୍ତିମ ସଂସ୍କାର ପାଇଁ ସୁରକ୍ଷା, ପରିବହନ ଏବଂ ଅନ୍ୟାନ୍ୟ ବ୍ୟବସ୍ଥା ପାଇଁ ପ୍ରାୟ ୧.୮ ବିଲିୟନ ୟେନ୍ ଖର୍ଚ୍ଚ ହୋଇଛି।
ଆସନ୍ତୁ ଜାଣିବା ଦୁନିଆର ୫ଟି ମହଙ୍ଗା ଅନ୍ତିମ ସଂସ୍କାର ବିଷୟରେ
୧. ରୋନାଲ୍ଡ ରେଗାନଙ୍କ ଅନ୍ତିମ ସଂସ୍କାର ପାଇଁ ୩୨୫୦ କୋଟି ଟଙ୍କା ଖର୍ଚ୍ଚ କରାଯାଇଥିଲା
ଦୁନିଆର ସବୁଠୁ ଦାମୀ ଅନ୍ତିମ ସଂସ୍କାର ବିଷୟରେ କହିବାକୁ ଗଲେ ଏହା ଆମେରିକାରେ ଘଟିଥିଲା । ହଲିଉଡର ପ୍ରସିଦ୍ଧ ତାରକା ତଥା ଆମେରିକାର ୪୦ ତମ ରାଷ୍ଟ୍ରପତି ରୋନାଲ୍ଡ ରେଗାନଙ୍କର ୨୦୦୪ ରେ ଦେହାନ୍ତ ହୋଇଥିଲା। ଜୁନ୍ ୧୧, ୨୦୦୪ରେ, ତାଙ୍କୁ ୱାଶିଂଟନ୍ ଡିସିରେ ଶେଷ ବିଦାୟ ଦିଆଯାଇଥିଲା । ତା’ପରେ ଲକ୍ଷ ଲକ୍ଷ ଲୋକ ତାଙ୍କୁ ଅନ୍ତିମ ବିଦାୟ ଦେବାକୁ ପହଞ୍ଚିଥିଲେ। ମିଡିଆ ରିପୋର୍ଟ ଅନୁଯାୟୀ, ରେଗାନଙ୍କ କଫିନ୍ ୱାଶିଂଟନ୍ ଡିସିରେ ଦୁଇ ଦିନ ରଖାଯାଇଥିଲା। ତତ୍କାଳୀନ ରାଷ୍ଟ୍ରପତି ଜର୍ଜ ଡବ୍ଲୁ ବୁଶ ଜାତୀୟ ଶୋକ ଦିବସ ଘୋଷଣା କରିଥିଲେ। ତା’ପରେ ସରକାର, ବେସରକାରୀ ଅନୁଷ୍ଠାନ ଏବଂ ଷ୍ଟକ୍ ମାର୍କେଟ ବନ୍ଦ ହୋଇଯାଇଥିଲା। ରୋନାଲ୍ଡ ରେଗାନଙ୍କ ଅନ୍ତିମ ସଂସ୍କାର ପାଇଁ ୩୨୫୦ କୋଟି ଟଙ୍କା ଖର୍ଚ୍ଚ କରାଯାଇଥିଲା।
୨. ଉତ୍ତର କୋରିଆର ତାନାସାହୀ ଶାସକଙ୍କ ଅନ୍ତିମ ସଂସ୍କାରରେ ୩୨୫ କୋଟି ଟଙ୍କା ଖର୍ଚ୍ଚ ହୋଇଛି
ଉତ୍ତର କୋରିଆର ଏକଛତ୍ରବାଦୀ ଶାସକ ତଥା ନେତା କିମ ଜୋଙ୍ଗ ଇଲଙ୍କର ୨୦୧୧ରେ ହୃଦଘାତରେ ମୃତ୍ୟୁ ଘଟିଥିଲା। ସାରା ଦେଶରେ ୧୧ ଦିନିଆ ଜାତୀୟ ଶୋକ ଘୋଷଣା କରାଯାଇଥିଲା । କିମ ଜୋଙ୍ଗ ଇଲଙ୍କ ଅନ୍ତିମ ସଂସ୍କାର ପାଇଁ ୩୨୫.୨ କୋଟି ଖର୍ଚ୍ଚ ହୋଇଥିଲା । ତାଙ୍କ ମୃତଦେହ ଉତ୍ତର କୋରିଆର ରାଜଧାନୀ ପ୍ୟୋଙ୍ଗୟାଙ୍ଗର କୁମୁସାନ ମେମୋରିଆଲ ପ୍ୟାଲେସରେ କାଚରେ ନିର୍ମିତ ଏକ କଫିନ୍ରେ ରଖାଯାଇଥିଲା।
୩. ଜନ୍ ଏଫ୍ କେନେଡିଙ୍କ ଅନ୍ତିମ ସଂସ୍କାରରେ ୧୨୧.୮୮ କୋଟି ଟଙ୍କା ଖର୍ଚ୍ଚ କରାଯାଇଥିଲା
ଆମେରିକାର ୩୫ତମ ରାଷ୍ଟ୍ରପତି ଜନ୍ ଏଫ୍ କେନେଡିଙ୍କ ଅନ୍ତିମ ସଂସ୍କାରରେ ୧୨୧.୮୮ କୋଟି ଖର୍ଚ୍ଚ କରାଯାଇଥିଲା। ଏହା ମଧ୍ୟ ଦୁନିଆର ସବୁଠାରୁ ମହଙ୍ଗା ଅନ୍ତିମ ସଂସ୍କାର ମଧ୍ୟରୁ ଅନ୍ୟତମ । କେନେଡିଙ୍କୁ ନଭେମ୍ବର ୨୨, ୧୯୬୩ ରେ ଟେକ୍ସାସର ଡାଲାସରେ ହତ୍ୟା କରାଯାଇଥିଲା। କେନେଡି ଆମେରିକାର ସବୁଠାରୁ ଲୋକପ୍ରିୟ ନେତା ଭାବରେ ବିବେଚିତ ହୋଇଥିଲେ। ଆର୍ଲିଙ୍ଗଟନ୍ ଜାତୀୟ ଶ୍ମଶାନରେ କେନେଡିଙ୍କୁ ଶବଦାହ କରାଯାଇଥିଲା। ଏହି ସମୟରେ ତାଙ୍କର ଶେଷ ଯାତ୍ରା ମେମୋରିଆଲ ବ୍ରିଜରୁ ନିଆଯାଇଥିଲା । ଏଥିରେ ଲକ୍ଷ ଲକ୍ଷ ଲୋକ ଭାଗ ନେଇଥିଲେ।
୪. ପୋପ୍ ଜନ୍ ପଲ୍ ଦ୍ୱିତୀୟଙ୍କ ଅନ୍ତିମ ସଂସ୍କାରରେ ୭୦ କୋଟି ଟଙ୍କା
କ୍ୟାଥୋଲିକ୍ ପୋପ୍ ଜନ୍ ପଲ୍-୨,୨୦୦୫ ରେ ମୃତ୍ୟୁ ବରଣ କରିଥିଲେ। ଅନେକ ଦେଶରେ ସାତ ଦିନ ଜାତୀୟ ଶୋକ ଘୋଷଣା କରାଯାଇଥିଲା। ତାଙ୍କ ଅନ୍ତିମ ସଂସ୍କାରରେ ୨୦୦ ଦେଶର ପ୍ରତିନିଧୀ ଯୋଗ ଦେଇଥିଲେ। ଏଥିରେ ପ୍ରାୟ ୭୦.୮୬ କୋଟି ଟଙ୍କା ଖର୍ଚ୍ଚ କରାଯାଇଥିଲା।
୫. ରାଣୀ ଏଲିଜାବେଥ ଏବଂ ତାଙ୍କ ମା’ଙ୍କ ଅନ୍ତିମ ସଂସ୍କାରରେ ମଧ୍ୟ କୋଟି ଟଙ୍କା ଖର୍ଚ୍ଚ କରାଯାଇଥିଲା
ରାଣୀ ଏଲିଜାବେଥ୍ ଦ୍ୱିତୀୟ ଏବଂ ତାଙ୍କ ମା ରାଣୀ ଏଲିଜାବେଥଙ୍କ ଅନ୍ତିମ ସଂସ୍କାରରେ ମଧ୍ୟ କୋଟି ଟଙ୍କା ଖର୍ଚ୍ଚ କରାଯାଇଥିଲା। ୨୦୦୨ରେ ରାଣୀ ଏଲିଜାବେଥ୍ ଦ୍ୱିତୀୟଙ୍କ ମା ରାଣୀ ଏଲିଜାବେଥଙ୍କ ମୃତ୍ୟୁ ହୋଇଥିଲା। ତା’ପରେ ବ୍ରିଟିଶ ସରକାର ତାଙ୍କର ରାଜକୀୟ ମର୍ଯ୍ୟାଦାରେ ଅନ୍ତିମ ସଂସ୍କାର କରିଥିଲେ। ଯେଉଁଥିରେ ପ୍ରାୟ ୪୭.୬୪ କୋଟି ଟଙ୍କା ଖର୍ଚ୍ଚ ହୋଇଥିଲା। ତାଙ୍କ ମୃତଦେହ ୱେଷ୍ଟମିନିଷ୍ଟର ହଲରେ ରଖାଯାଇଥିଲା। ସମ୍ପ୍ରତି, ରାଣୀ ଏଲିଜାବେଥ୍ ଦ୍ୱିତୀୟ ମଧ୍ୟ ଦେହାନ୍ତ କରିଛନ୍ତି। ତାଙ୍କ ଅନ୍ତିମ ସଂସ୍କାର ପାଇଁ ପ୍ରାୟ ୭୩.୭ କୋଟି ଟଙ୍କା ଖର୍ଚ୍ଚ କରାଯାଇଥିଲା।
