ଖୁବଶୀଘ୍ର ଏୟାର ଇଣ୍ଡିଆରେ ମିଶିବ ଭିସ୍ତାରା ଏୟାରଲାଇନ୍ସ; ବିମାନ ସେବା କ୍ଷେତ୍ରରେ ନିଜର ଆଧିପତ୍ୟ ବିସ୍ତାର କରିବ ଟାଟା

ନୂଆଦିଲ୍ଲୀ: ଦୁଇ ପ୍ରମୁଖ ବିମାନ କଂପାନୀ ଏୟାର ଇଣ୍ଡିଆ-ଭିସ୍ତାରାର ମିଶ୍ରଣ ଘଟିବ । ମିଶ୍ରଣ ନେଇ ଟାଟା ସନ୍ସ ଏବଂ ସିଙ୍ଗାପୁର ଏୟାରଲାଇନ୍ସ ମଧ୍ୟରେ ହୋଇଛି ସହମତି । ମାର୍ଚ୍ଚ ୨୦୨୪ ସୁଦ୍ଧା ମିଶ୍ରଣ ପ୍ରକ୍ରିୟା ସାରିବାକୁ ଉଭୟ ପକ୍ଷ ଲକ୍ଷ୍ୟ ଧାର୍ଯ୍ୟ କରିଛନ୍ତି । ଏହା ସହିତ ବିମାନ ସେବା କ୍ଷେତ୍ରରେ ପୁଣି ନିଜର ଆଧିପତ୍ୟ ବିସ୍ତାର କରିବ ଟାଟା।

ମଙ୍ଗଳବାର ଏ ନେଇ ଘୋଷଣା କରିଛି ଟାଟା ଗ୍ରୁପ୍‌ । ଅର୍ଥାତ ପୂର୍ବରୁ ଚଳାଚଳ କରୁଥିବା ଭିସ୍ତାରା ବିମାନ ସେବା ଏୟାର ଇଣ୍ଡିଆ ସହିତ ମିଶିବ । ଏହା ହେଲେ ଏୟାର ଇଣ୍ଡିଆ ଭାରତର ସର୍ବବୃହତ ଘରୋଇ ବିମାନ ସେବା କମ୍ପାନୀ ହୋଇଯିବ । ମାର୍ଚ୍ଚ ୨୦୨୪ରେ ଭିସ୍ତାରା ଏୟାର୍‌ ଲାଇନ୍‌, ଏୟାର ଇଣ୍ଡିଆ ସହିତ ମିଶିବା ନେଇ ସିଙ୍ଗାପୁର ଏୟାର ଲାଇନ୍‌ ପକ୍ଷରୁ ଏକ ପ୍ରେସ୍‌ ରିଲିଜ୍‌ ଜାରି କରାଯାଇଛି । ଟାଟା ସହିତ ମିଶି ସିଙ୍ଗାପୁର ଏୟାର୍‌ ଲାଇନ୍‌ ଭିସ୍ତାରାର କିଛି ସେୟାର ଅଧିଗ୍ରହଣ କରିଛି ।

ସୂଚନା ଅନୁସାରେ, ସିଙ୍ଗାପୁର ଏୟାରଲାଇନ୍ ଏବଂ ଏୟାର ଇଣ୍ଡିଆ ମିଳିତ ଭାବେ ଭିସ୍ତାରାର ୨୫ ପ୍ରତିଶତ ଅଂଶଧନ କିଣିବାକୁ ଯାଉଛନ୍ତି । ଯାହାକି ପାଖାପାଖି ୨ ହଜାର କୋଟି ଟଙ୍କା ଡିଲ୍‌ରୁ ଅଧିକ ହେବ । ବର୍ତ୍ତମାନ ସିଙ୍ଗାପୁର ଏୟାର ଲାଇନ୍‌ସ ପାଖରେ ଭିସ୍ତାରାର ୪୯ ପ୍ରତିଶତ ସେୟାର ରହିଥିବା ବେଳେ ୫୧ ପ୍ରତିଶତ ଟାଟା ନିକଟରେ ରହିଛି । ନିୟାମକଙ୍କ ଅନୁମତି ପରେ ଏହା ୨୦୨୪ ମାର୍ଚ୍ଚ ମାସ ସୁଦ୍ଧା ସମ୍ପୂର୍ଣ୍ଣ ମିଶିବା ନେଇ ଏହି ରିଲିଜ୍‌ରୁ ଜଣାପଡ଼ିଛି ।

ଟାଟା ସନ୍ସର ଅଧ୍ୟକ୍ଷ ଏନ୍‌ ଚନ୍ଦ୍ରଶେଖରନ୍‌ କହିଛନ୍ତି, ‘କମ୍ପାନୀକୁ ବିଶ୍ବସ୍ତରୀୟ କରିବା ପାଇଁ ଭିସ୍ତାରା ଏବଂ ଏୟାର ଇଣ୍ଡିଆର ମିଶ୍ରଣ ଏକ ଗୁରୁତ୍ବପୂର୍ଣ୍ଣ ପଦକ୍ଷେପ । ପ୍ରତ୍ୟେକ ଥର ପ୍ରତ୍ୟେକ ଯାତ୍ରୀଙ୍କୁ ସର୍ବୋତ୍କୃଷ୍ଟ ସେବା ଯୋଗାଇ ଦେବା ଏହି ମିଶ୍ରଣର ମୂଳ ଲକ୍ଷ୍ୟ । ନେଟଓ୍ବର୍କ ବଢାଇବା, ଗ୍ରାହକ ଚାହୁଁଥିବା ସୁବିଧାଗୁଡିକୁ ଉପଲବ୍ଧ କରାଇବା, ସୁରକ୍ଷା ବ୍ୟବସ୍ଥାକୁ ସୁଦୃଢ କରିବା ଏବଂ ସମୟରେ ସେବା ଯୋଗାଇବା ଏହାର ମୂଳ ଲକ୍ଷ୍ୟ’।

Leave a comment