ଇରାନରେ ଦିନକରେ ୧୨ ଜଣଙ୍କୁ ଫାଶୀ

ନୂଆଦିଲ୍ଲୀ : ଇରାନର ଦକ୍ଷିଣପୂର୍ବ ପ୍ରଦେଶ ସିସ୍ତାନ-ବେଲୁଚିସ୍ତାନର ଏକ ଜେଲରେ ବନ୍ଦୀ ଥିବା ୧୨ ଜଣ କଏଦୀଙ୍କୁ ଗୋଟିଏ ଦିନରେ ଫାଶୀ ଦିଆଯାଇଛି। ଫାଶୀ ପାଇଥିବା ଏହି ୧୨ ଜଣଙ୍କ ମଧ୍ୟରେ ଜଣେ ମହିଳା ମଧ୍ୟ ଅନ୍ତର୍ଭୁକ୍ତ ରହିଛନ୍ତି। ସମସ୍ତ ଅଭିଯୁକ୍ତ ନିଶାଦ୍ରବ୍ୟ କାରବାର କିମ୍ବା ହତ୍ୟାକାଣ୍ଡରେ ସଂଶ୍ଳିଷ୍ଟ ରହିଥିଲେ ବୋଲି କୁହାଯାଇଛି। ଏମାନଙ୍କ ମଧ୍ୟରୁ ୬ ଜଣ ନିଶା କାରବାରକୁ ନେଇ ଦୋଷୀ ସାବ୍ୟସ୍ତ ହୋଇଥିଲେ।

ବାକି ଅଭିଯୁକ୍ତ ହତ୍ୟାକାଣ୍ଡ ଘଟଣାରେ ଦୋଷୀ ସାବ୍ୟସ୍ତ ହୋଇଥିଲେ। ହେଲେ ସମସ୍ତ ଅଭିଯୁକ୍ତ ଇରାନର ଲଘୁ ସଂପ୍ରଦାୟ ବେଲୁଚ ବୋଲି ଜଣାପଡ଼ିଛି। ସିସ୍ତାନ-ବେଲୁଚିସ୍ତାନ ଇରାନର ସବୁଠୁ ବଡ଼ ପ୍ରଦେଶ ହୋଇଥିଲେ ହେଁ ଅନ୍ୟ ପ୍ରଦେଶ ତୁଳନାରେ ଏହା ଅନୁନ୍ନତ। ଏଠାକାର ଜନସଂଖ୍ୟା ମଧ୍ୟରେ ସର୍ବାଧିକ ସୁନ୍ନି ବେଲୁଚ ସଂପ୍ରଦାୟର ଲୋକମାନେ ବସବାସ କରିଥାଆନ୍ତି।

Leave a comment