ଶ୍ରୀଲଙ୍କା ସିରିଜ୍ ପୂର୍ବରୁ ଟିମ୍ ଇଣ୍ଡିଆକୁ ବଡ ଝଟକା, ଦଳରୁ ବାଦ୍ ପଡିଲେ ଜବରଦସ୍ତ ଫର୍ମରେ ଥିବା ବିସ୍ଫୋରକ ବ୍ୟାଟ୍ସମ୍ୟାନ୍ ସୂର୍ଯ୍ୟକୁମାର
ନୂଆଦିଲ୍ଲୀ : ୱେଷ୍ଟଇଣ୍ଡିଜ୍ ବିପକ୍ଷ ଦିନିକିଆ ଏବଂ ଟ୍ବେଣ୍ଟି-୨୦ ଶୃଙ୍ଖଳାକୁ ୬-୦ (ଉଭୟ ଶୃଙ୍ଖଳାକୁ ୩-୦ରେ ଜିତିବା ପରେ)ରେ ପୋଛିନେବା ପରେ ଭାରତୀୟ କ୍ରିକେଟ୍ ଦଳ ଏବେ ଗୁରୁବାରଠାରୁ ଆରମ୍ଭ ହେବାକୁ ଯାଉଥିବା ଶ୍ରୀଲଙ୍କା ବିପକ୍ଷ ଶୃଙ୍ଖଳା ଉପରେ ନଜର ପକାଇଛି। ଶ୍ରୀଲଙ୍କା ବିପକ୍ଷରେ ଭାରତ ଦୁଇଟି ପର୍ଯ୍ୟାୟରେ ଦୁଇଟି ଶୃଙ୍ଖଳା ଖେଳିବ। ପ୍ରଥମେ ତିନିଟି ଟ୍ବେଣ୍ଟି-୨୦ ଖେଳିବ। ତା’ ପରେ ଦୁଇଟି ଟେଷ୍ଟ୍ ମ୍ୟାଚ୍ରେ ମଧ୍ୟ ଅବତ୍ତୀର୍ଣ୍ଣ ହେବ। ଆସନ୍ତାକାଲିଠୁ ଭାରତ ଶ୍ରୀଲଙ୍କା ବିପକ୍ଷରେ ଟି-୨୦ ଖେଳିବ।
ଶ୍ରୀଲଙ୍କା ବିପକ୍ଷ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜର ଗୋଟିଏ ଦିନ ପୂର୍ବରୁ ଭାରତୀୟ ଦଳକୁ ଆଉ ଏକ ବଡ଼ ଝଟକା ଲାଗିଛି। ଦ୍ରୁତ ବୋଲର ଦୀପକ ଚହରଙ୍କ ପରେ ବିସ୍ଫୋରକ ବ୍ୟାଟ୍ସମ୍ୟାନ୍ ସୂର୍ଯ୍ୟକୁମାର ଯାଦବ ମଧ୍ୟ ଦଳରୁ ବାଦ୍ ପଡିଛନ୍ତି। ହେୟାର ଲାଇନ୍ ଫ୍ରାକଚର୍ ଯୋଗୁଁ ସୂର୍ଯ୍ୟକୁମାର ଟି-୨୦ ସିରିଜରୁ ବଞ୍ଚିତ ହୋଇଛନ୍ତି । ଗଣମାଧ୍ୟମ ରିପୋର୍ଟ ଅନୁଯାୟୀ, ୱେଷ୍ଟଇଣ୍ଡିଜ୍ ଦଳ ବିପକ୍ଷରେ ଖେଳାଯାଇଥିବା ତୃତୀୟ ଟି-୨୦ ମ୍ୟାଚରେ ସୂର୍ଯ୍ୟକୁମାର ଯାଦବ ଆହତ ହୋଇଥିଲେ। ଏହାପୂର୍ବରୁ ମଙ୍ଗଳବାର ବିଳମ୍ବିତ ରାତିରେ ଦୀପକ ଚହର ମଧ୍ୟ ଶ୍ରୀଲଙ୍କା ବିପକ୍ଷ ଟି-୨୦ ସିରିଜରୁ ବାଦ୍ ପଡିଥିଲେ। ହାମଷ୍ଟ୍ରିଂ ସମସ୍ୟା ଯୋଗୁଁ ଦୀପକ ଚହର ଦଳ ବାହାରେ ଥିଲେ। ତାଙ୍କୁ ସମ୍ପୂର୍ଣ୍ଣ ସୁସ୍ଥ ହେବାକୁ ୫ ରୁ ୬ ସପ୍ତାହ ଲାଗିବ । ସେ ଆଇପିଏଲର କିଛି ପ୍ରାରମ୍ଭିକ ମ୍ୟାଚରୁ ମଧ୍ୟ ବଞ୍ଚିତ ହୋଇପାରନ୍ତି ।
ସମ୍ପ୍ରତି ଭାରତୀୟ ଦଳରେ ଆହତ ଖେଳାଳିଙ୍କ ସଂଖ୍ୟା ଯଥେଷ୍ଟ ବୃଦ୍ଧି ପାଇବାରେ ଲାଗିଛି । କେଏଲ୍ ରାହୁଲ, ୱାଶିଂଟନ୍ ସୁନ୍ଦର ଏବଂ ଅକ୍ଷର ପଟେଲଙ୍କ ପରି ଖେଳାଳିମାନେ ଆହତ ହୋଇ ଟିମ୍ ଇଣ୍ଡିଆରୁ ଦୂରେଇ ଯାଉଛନ୍ତି। ବର୍ତ୍ତମାନ ସୂର୍ଯ୍ୟକୁମାର ଏବଂ ଦୀପକ ଚହର ଆଉଟ୍ ହେବା ସହିତ ଦଳର ସମସ୍ୟା ଆହୁରି ବଢ଼ିବ। ସୂଚନାଯୋଗ୍ୟ, ଶ୍ରୀଲଙ୍କା ବିପକ୍ଷ ସୀମିତ ଓଭର ସିରିଜରେ ବିରାଟ କୋହଲି ଏବଂ ରିଷଭ ପନ୍ତ ମଧ୍ୟ ଖେଳିବେ ନାହିଁ। ଉଭୟ ଖେଳାଳିଙ୍କୁ ବିସିସିଆଇ ବିଶ୍ରାମ ଦେଇଛି। ଏହି ଦୁଇ ଖେଳାଳି ଟେଷ୍ଟ ସିରିଜରୁ ପଡ଼ିଆକୁ ଫେରିବେ।
ଭାରତ-ଶ୍ରୀଲଙ୍କା ଟି-୨୦ ସିରିଜ୍ ଗୁରୁବାର ଠାରୁ ଆରମ୍ଭ ହେବ । ଏଭଳି ପରିସ୍ଥିତିରେ ଚହର ଏବଂ ସୂର୍ଯ୍ୟକୁମାରଙ୍କ ସ୍ଥାନରେ ବିକଳ୍ପ ଖେଳାଳି ଘୋଷଣା କରିବା ସମ୍ଭାବନା କମ୍ ଅଛି। ଏହାର କାରଣ ହେଉଛି ଏକ ବଦଳ ଭାବରେ ନୂଆ ଖେଳାଳି ଦଳରେ ଯୋଗଦେବା ଦ୍ୱାରା କରୋନା ସଂକ୍ରମଣକୁ ରୋକିବା ପାଇଁ ପ୍ରୋଟୋକଲ୍ ଅନ୍ତର୍ଗତ ଆଇସୋଲେସନ ପ୍ରକ୍ରିୟା ସମ୍ପୂର୍ଣ୍ଣ କରିବାକୁ ପଡିବ ।
