ଶାବଳରେ ପିଟିପିଟି ମା’କୁ ହତ୍ୟାକଲା ପୁଅ

ତେଲକୋଇ : ଯେଉଁ ମା’ ପୁଅକୁ କୋଳେଇ କାଖେଇ ବଡ଼ କରିଥିଲା ଏବଂ ନିଜ ପଣତକାନିରେ ମୁହଁ ପୋଛି ଦେଉଥିଲା, ସେହି ମା’କୁ ମଦ ନିଶାରେ ଶାବଳରେ ପିଟି ହତ୍ୟା କରିଛି ନୃଶଂସ ପୁଅ। ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ତେଲକୋଇ ଥାନା ଅନ୍ତର୍ଗତ ବନବିହାରିପୁର ଗାଁ ମୁଣ୍ଡା ସାହିରେ। ସୂଚନା ଅନୁସାରେ, ମଙ୍ଗଳବାର ବିଳମ୍ୱିତ ରାତିରେ ପୁଅ ଡୁବୁରୁ ମୁଣ୍ଡା (୩୦) ମଦପିଇ ଘରକୁ ଫେରିଥିଲା। ମଦ କାହିଁକି ପିଉଛୁ ବୋଲି ମା’ ତୁଳେଇ ମୁଣ୍ଡା (୬୦) ପୁଅକୁ ତାଗିଦ କରିଥିଲେ।

ଏହି କଥାକୁ ନେଇ ମା’-ପୁଅଙ୍କ ମଧ୍ୟରେ ବଚସା ହୋଇଥିଲା। ଡୁବୁରୁ ମଦନିଶାରେ ଉତ୍ତ୍ୟକ୍ତ ହୋଇ ପ୍ରଥମେ ମା’ର ମୁଣ୍ଡକୁ ତଳେ ପିଟି ଦେଇଥିଲା। ପରେ ଏକ ଶାବଳ ଆଣି ମୁଣ୍ଡକୁ ପ୍ରହାର କରିଥିଲା। ଫଳରେ ଘଟଣାସ୍ଥଳରେ ତୁଳେଇ ମୁଣ୍ଡାଙ୍କ ମୃତ୍ୟୁ ଘଟିଥିଲା। ପରେ ଡୁବୁରୁ ଶବକୁ ଘୋଷାଡି ଘୋଷାଡି ନେଇ ଭଉଣୀଙ୍କ ଘରେ ପକାଇ ଦେଇଥିଲା। ଆଜି ସକାଳୁ ତୁଳେଇଙ୍କ ବଡଝିଅ ଶ୍ରାବଣୀ ମା’ର ମୃତଦେହକୁ ଦେଖି ସାହିଲୋକଙ୍କୁ ଜଣାଇଥିଲା। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ଡୁବୁରକୁ ଅଟକ ରଖି ତଦନ୍ତ ଚଳାଇଛି।

Leave a comment