କେଜିରୁ ନବମ ଶ୍ରେଣୀ ପର୍ଯ୍ୟନ୍ତ ହେବ କ୍ଲାସ ପ୍ରମୋସନ ପରୀକ୍ଷା : ଦଶମ ଓ ଦ୍ୱାଦଶ ପରୀକ୍ଷା ନେଇ ବ୍ୟବସ୍ଥା କରିବ ବୋର୍ଡ
ଭୁବନେଶ୍ବର : ରାଜ୍ୟରେ ସ୍କୁଲ, କଲେଜ ଖୋଲିବା ସହ ପରୀକ୍ଷା ହେବ। ଏନେଇ ସୂଚନା ଦେଇଛନ୍ତି ମୁଖ୍ୟ ସଚିବ ସୁରେଶ ମହାପାତ୍ର। କେଜିରୁ ନବମ ଶ୍ରେଣୀ ପର୍ଯ୍ୟନ୍ତ କ୍ଲାସ ପ୍ରମୋସନ ପରୀକ୍ଷା ହେବ । ଏକାଦଶରୁ ଦ୍ୱାଦଶ ଯିବାକୁ ବି କ୍ଲାସ ପ୍ରମୋସନ ପରୀକ୍ଷା ହେବ । ଉଭୟ ପରୀକ୍ଷା କ୍ଲାସରୁମ ଆସେସମେଣ୍ଟ ମାର୍କ ଅନୁସାରେ କରାଯିବ । ଦଶମ ଏବଂ ଦ୍ୱାଦଶ ବୋର୍ଡ ପରୀକ୍ଷା ନେଇ ବୋର୍ଡ ବ୍ୟବସ୍ଥା କରିବ। ଉଚ୍ଚଶିକ୍ଷା ଅନୁଷ୍ଠାନ ପୂର୍ବ ଗାଇଡଲାଇନ ଅନୁସାରେ ପରୀକ୍ଷା କରିବେ ।
ସେହିପରି ପିଲାମାନଙ୍କର ପାଠ ପଢାରେ ହୋଇଥିବା କ୍ଷତିକୁ ଭରଣା ପାଇଁ ହେବ ଅତିରିକ୍ତ କ୍ଲାସ । ଅନ୍ୟପଟେ ଦୀର୍ଘ ୨ ବର୍ଷ ପରେ ସ୍କୁଲ ଦେଖିବେ ସାନ ପିଲା । ଦୁଇ ବର୍ଷର ବ୍ୟବଧାନ ପରେ ସପ୍ତମ ଶ୍ରେଣୀ ପିଲା ସ୍କୁଲ ଯିବେ । ଆସନ୍ତା ୧୪ ତାରିଖରେ କେଜିରୁ ସପ୍ତମ ପର୍ଯ୍ୟନ୍ତ ସ୍କୁଲ ଖୋଲିବ । କୋଭିଡ ପାଇଁ ଦୀର୍ଘ ୨ ବର୍ଷ ହେଲା ସ୍କୁଲ ଯାଇପାରୁନଥିଲେ ସାନ ପିଲା। ୨ ବର୍ଷ ହେଲା ଯେହେତୁ ସ୍କୁଲରେ ପାଠ ପଢ଼ାଯାଇ ନାହିଁ, ତେଣୁ ଶିକ୍ଷକମାନେ ପିଲା ଓ ଅଭିଭାବକଙ୍କୁ ସହଯୋଗ କରିବେ। ଦରକାର ପଡିଲେ ଖରାଛୁଟି ଅବଧି କମାଯାଇ ପାଠପଢାଯିବ ।
ରାଜ୍ୟରେ ଅଷ୍ଟମରୁ ଉର୍ଦ୍ଧ୍ବ ଶ୍ରେଣୀର ସମସ୍ତ ଛାତ୍ରଛାତ୍ରୀଙ୍କ (କଲେଜ, ବିଶ୍ବବିଦ୍ୟାଳୟ ଏବଂ ବୈଷୟିକ ଶିକ୍ଷାନୁଷ୍ଠାନ) ଶ୍ରେଣୀ ଗୃହ ପାଠପଢା ୭ ଫେବୃଆରୀରୁ ଆରମ୍ଭ ହେବ। ସେହିପରି କେଜିରୁ ୭ମ ଶ୍ରେଣୀ ପିଲାଙ୍କ ପାଠପଢା ଫେବୃଆରୀ ୧୪ରୁ ଆରମ୍ଭ ହେବ। ବିଭିନ୍ନ ଶିକ୍ଷାନୁଷ୍ଠାନର ହଷ୍ଟେଲ ମଧ୍ଯ ୭ ତାରିଖରୁ ଖୋଲାଯିବ। pic.twitter.com/hDZiHRRMsk
— I & PR Department, Odisha (@IPR_Odisha) February 3, 2022
ସୂଚନାଯୋଗ୍ୟ ରାଜ୍ୟରେ କରୋନା ସଂକ୍ରମଣ ନିୟନ୍ତ୍ରଣକୁ ଆସିବା ସହ ବର୍ତ୍ତମାନ ସ୍ଥିତି ସ୍ବାଭାବିକ ହୋଇଛି। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ରାଜ୍ୟରେ ଶିକ୍ଷାନୁଷ୍ଠାନରେ ପାଠପଢ଼ା ସ୍ୱାଭାବିକ କରିବାକୁ ନିଷ୍ପତ୍ତି ନେଇଛନ୍ତି । ରାଜ୍ୟ ସରକାରଙ୍କ ନିଷ୍ପତ୍ତି ଅନୁସାରେ ରାଜ୍ୟରେ ଆସନ୍ତା ୭ ତାରିଖ ଅର୍ଥାତ ସୋମବାରରୁ ଅଷ୍ଟମ ଶ୍ରେଣୀ ଉପରକୁ ସମସ୍ତ ଶ୍ରେଣୀର ପାଠ ପଢା ସ୍କୁଲରେ ଆରମ୍ଭ ହେବ। ଏଥି ସହିତ ୭ ତାରିଖରୁ ମଧ୍ୟ ଉଚ୍ଚଶିକ୍ଷା ବିଭାଗ ସମେତ ଟେକନିକାଲ,ମେଡିକାଲ ଓ ପ୍ରଫେସନାଲ ଆଦି ଶିକ୍ଷାନୁଷ୍ଠାନଗୁଡ଼ିକ ଖୋଲିବ। ଏଥି ସହିତ ସମସ୍ତ ସ୍କୁଲ, କଲେଜ, ବିଶ୍ୱବିଦ୍ୟାଳୟ ସମେତ ସବୁ ପ୍ରଫେସନାଲ ଶିକ୍ଷାନୁଷ୍ଠାନ ଗୁଡିକରେ ମଧ୍ୟ ପିଲାମାନଙ୍କ ପାଇଁ ହଷ୍ଟେଲ ଖୋଲାଯିବ। ଅନ୍ୟପଟେ ଆସନ୍ତା ଫେବୃଆରୀ ୧୪ରୁ ଖୋଲିବ କେଜିରୁ ସପ୍ତମ ଶ୍ରେଣୀ ପିଲାମାନଙ୍କ ପାଇଁ ସ୍କୁଲ। ଏନେଇ ପ୍ରେସବାର୍ତ୍ତାରେ ମୁଖ୍ୟ ସଚିବ ସୁରେଶ ମହାପାତ୍ରଙ୍କ ସୂଚନା ଦେଇଛନ୍ତି।