ଋଷ ଆରମ୍ଭ କଲା ପରମାଣୁ ଯୁଦ୍ଧାଭ୍ୟାସ

ନୂଆଦିଲ୍ଲୀ: ଗୋଟିଏ ପଟେ ବେଲାଋଷରେ ଋଷ ଓ ୟୁକ୍ରେନ ମଧ୍ୟରେ ଆଲୋଚନା ଶେଷ ହୋଇଛି। ଏହାରି ମଧ୍ଯରେ ପରମାଣୁ ଯୁଦ୍ଧ ଆଡ଼କୁ ମୁହାଁଉଛି ଋଷ-ୟୁକ୍ରେନ ଯୁଦ୍ଧ । ଋଷ ପରମାଣୁ ଯୁଦ୍ଧାଭ୍ୟାସ ଆରମ୍ଭ କରିଦେଇଛି । ଯାହାକୁ ନେଇ ସାରା ବିଶ୍ବବାସୀଙ୍କ ନିଦ ହଜାଇ ଦେଇଛି ।  ଯଥା ସମ୍ଭବ ବିନାଶର ଏହି ଖେଳ ୟୁକ୍ରେନ ମାଟିରୁ ଆରମ୍ଭ ହୋଇ ନିମିଷକରେ ସାରା ବିଶ୍ବକୁ ବ୍ୟାପି ଯାଇପାରେ ।

ସୂଚନାଯୋଗ୍ୟ, ରବିବାର ରାଷ୍ଟ୍ରପତି ଭ୍ଲାଦିମିର ପୁଟିନ୍ ପରମାଣୁ ବୋମା ଟିମକୁ ଆର୍ଲଟ ରହିବାକୁ ନିର୍ଦ୍ଦେଶ ଦେଇଥିଲେ । ଆଜି ଋଷ ପୂରା ଦମରେ ଆରମ୍ଭ କରିଛି ପରମାଣୁ ଯୁଦ୍ଧାଭ୍ୟାସ । ଋଷ ପ୍ରତିରକ୍ଷା ମନ୍ତ୍ରୀ ଜେନେରାଲ ସରଗେଇ ସୋଇଗୁ ରାଷ୍ଟ୍ରପତି ପୁଟିନଙ୍କୁ ସୂଚନା ଦେଇଛନ୍ତି ।

ଋଷର ଉତ୍ତର ଓ ପ୍ରଶାନ୍ତ ମହାସାଗର ଅଞ୍ଚଳର ମିଜାଇଲ କମାଣ୍ଡକୁ ହାଇ ଆର୍ଲଟରେ ରଖାଯାଇଥିବା ରକ୍ଷା ମନ୍ତ୍ରାଳୟ ପକ୍ଷରୁ ଦାବି କରାଯାଇଛି । ଅନ୍ୟପକ୍ଷରେ ପଡୋଶୀ ତଥା ସହଯୋଗୀ ବେଲାଋଷରେ ଋଷ ପରମାଣୁ ବୋମା ମୁତୟନ କରିପାରେ । ଏହି ଖବର ମିଳିବା ପରେ ବେଲାଋଷକୁ ନେଇ ୟୁରୋପିୟନ ୟୁନିୟନ ପକ୍ଷରୁ ଆର୍ଲଟ୍ ଜାରି କରାଯାଇଛି ।

ସୂଚନାଯୋଗ୍ୟ, ଯୁଦ୍ଧ ଆରମ୍ଭ ହେବା ଦିନରୁ ରାଷ୍ଟ୍ରପତି ପୁଟିନ୍ ନାଟୋ ଦେଶଙ୍କୁ ପରମାଣୁ ଯୁଦ୍ଧର ଧମକ ଦେଇ ଆସିଛନ୍ତି । ଗତ ଗୁରୁବାର ପୁଟିନ ୟୁକ୍ରେନକୁ ସମର୍ଥନ କରୁଥିବା ଦେଶଙ୍କୁ ଧମକ ଦେଇ କହିଥିଲେ- ୟୁକ୍ରେନ ବିବାଦରେ ଯଦି କୌଣସି ବାହାର ଦେଶ ମୁଣ୍ଡ ପୂରାଇବ ତେବେ ସେ ଏମିତି ପରିଣାମ ଭୋବିଗ ଯେ ଇତିହାସ ମନେ ରଖିବ । ଯାହା କେବେ କେହି ଦେଖିଛନ୍ତି ନା ଆଗକୁ ଦେଖିବେ । ଏହାର ଜବାବରେ ଫ୍ରାନ୍ସ ପକ୍ଷରୁ କୁହାଯାଇଥିଲା, ‘ଋଷ ଏହା ଭୁଲିବା ଉଚିତ ନୁହେଁ ଯେ, ନାଟୋ ଦେଶଙ୍କ ପାଖରେ ବି ପରମାଣୁ ବୋମା ରହିଛି ।’

Leave a comment