କରୋନା ସମୟରେ ଦୁଇବର୍ଷ କମିଛି ଲୋକଙ୍କ ଜୀବନକାଳ
ନୂଆଦିଲ୍ଲୀ: ବିଗତ ଦୁଇ ବର୍ଷ ଧରି ମହାମାରୀ କରୋନା କୋଟି କୋଟି ଲୋକଙ୍କ ଜୀବନ ନେଇଥିବା ବେଳେ ଏହି ମହାମାରୀକୁ ନେଇ ଅନେକଙ୍କ ଜୀବନଶୈଳୀ ମଧ୍ୟ ବଦଳିଯାଇଛି। କରୋନା ପୂର୍ବ ଏବଂ ପରବର୍ତ୍ତୀ ଜୀବନଶୈଳୀରେ ଅନେକଙ୍କ କ୍ଷେତ୍ରରେ ପରିବର୍ତନ ଘଟିଛି । ଏବେ ଅନେକ କଟକଣା ଏବଂ ସତର୍କତା ସହ ଲୋକଙ୍କୁ ବଞ୍ଚିବାକୁ ପଡୁଛି । ତେବେ ସବୁଠାରୁ ବଡ଼ କଥା ହେଲା ଏହି ମହାମାରା ଯୋଗୁଁ ଅପ୍ରତ୍ୟାଶିତ ଭାବେ ଲୋକଙ୍କ ଆୟୁ ମଧ୍ୟ କମିଛି ବୋଲି ଏ ସମ୍ପର୍କରେ କରାଯାଇଥିବା ଏକ ସ୍ବତନ୍ତ୍ର ଅନୁଧ୍ୟାନରୁ ଜଣାପଡ଼ିଛି । ହାରାହାରି ଭାବେ କରୋନା ମହାମାରୀ ଲୋକଙ୍କ ଦୁଇବର୍ଷ ଆୟୁଷ ହାନି କରିଥିବା ଇଣ୍ଟରନ୍ୟାସନାଲ ଇନଷ୍ଟିଚ୍ୟୁଟ୍ ଫର ପପୁଲେସନ୍ ଷ୍ଟଡିଜ୍ (ଆଇଆଇପିଏସ) ର ବୈଜ୍ଞାନିକମାନେ କହିଛନ୍ତି । ୨୦୧୯ ରେ ପୁରୁଷଙ୍କ ପ୍ରତ୍ୟାଶିତ ଜୀବନକାଳ ୬୯.୫ ଏବଂ ମହିଳାଙ୍କର ୭୨ ବର୍ଷ ରହିଥିଲା। ହେଲେ ୨୦୨୦ରେ ଏହା ଯଥାକ୍ରମେ ୬୭.୫ ବର୍ଷ ଏବଂ ୬୯.୮ ବର୍ଷକୁ ଖସି ଆସିଛି ।
କରୋନା ପାଇଁ ୩୯ ରୁ ୬୯ ବର୍ଷ ମଧ୍ୟରେ ସର୍ବାଧିକ ପୁରୁଷଙ୍କ ଜୀବନହାନି ଘଟିଛି। ବିଶ୍ବରେ ପୂର୍ବରୁ ଦେଖାଯାଇଥିବା ଅନ୍ୟ ମହାମାରୀ ପାଇଁ ମଧ୍ୟ ଲୋକଙ୍କ ଆୟୁଷ ହାନି ଘଟିବାର ନଜିର ରହିଛି ବୋଲି ଆଇଆଇପିଏସ୍ ନିର୍ଦ୍ଦେଶକ କେ ଏସ୍ ଜେମ୍ସ କହିଛନ୍ତି । ଏଚ୍.ଆଇ.ଭି. (ଏଡସ୍) ପରେ ବିଶେଷକରି ଆଫ୍ରିକୀୟ ଦେଶମାନଙ୍କରେ ଲୋକଙ୍କ ଜୀବନକାଳ କମିଯାଇଥିଲା ବୋଲି ସେ କହିଛନ୍ତି ।