Latest Odisha News, Breaking News Today | Top Updates on Corona

ମୋଦୀଙ୍କ ବିମାନକୁ ନିଜ ବାୟୁସୀମାରେ ଉଡାଣ ଅନୁମତି ଦେଇନଥିଲା ପାକିସ୍ତାନ କିନ୍ତୁ ଇମ୍ରାନଙ୍କ ବିମାନକୁ ଅନୁମତି ଦେଲା ଭାରତ

ନୂଆଦିଲ୍ଲୀ : ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ବିମାନକୁ ଭାରତୀୟ ବାୟୁସୀମା ବ୍ୟବହାର କରିବାର ଅନୁମତି ଦେଇଛି ଭାରତ। ଦିନେ ଯେଉଁ ପାକିସ୍ତାନ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିମାନକୁ ନିଜ ବାୟୁସୀମା ମଧ୍ୟରେ ଉଡାଣର ଅନୁମତି ଦେଇନଥିଲା, ଆଜି ସେହି ପାକିସ୍ତାନର ପ୍ରଧାନମନ୍ତ୍ରୀ ଇମ୍ରାନ ଖାନ୍‌ଙ୍କ ବିମାନକୁ ଭାରତ ବାୟୁସୀମା ବ୍ୟବହାର କରିବାକୁ ଅନୁମତି ଦେଇଛନ୍ତି କେନ୍ଦ୍ର ସରକାର।

ସୂଚନାଅନୁସାରେ ଆଜି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ୍‌ ଶ୍ରୀଲଙ୍କା ଗସ୍ତ କରିବେ । ବିମାନ ଯୋଗେ ଶ୍ରୀଲଙ୍କା ଯିବେ ଇମ୍ରାନ ଖାନ୍ । ତେବେ ପାକିସ୍ତାନ, ଭାରତର ଆକାଶପଥ ସୀମା ବ୍ୟବହାର କରିବାକୁ ଅନୁମତି ମାଗିଥିଲା । ଭାରତ ସରକାର ଇମ୍ରାନ ଖାନଙ୍କ ବିମାନକୁ ଭାରତୀୟ ବାୟୁମଣ୍ଡଳ ଦେଇ ଯିବାକୁ ଅନୁମତି ଦେଇଛନ୍ତି।  ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ୨୩ ଫେବୃଆରୀରୁ ଦୁଇ ଦିନିଆ ଶ୍ରୀଲଙ୍କା ଗସ୍ତରେ ଯିବେ। ଏହି ଗସ୍ତ ସମୟରେ ଇମ୍ରାନ ଖାନଙ୍କ ସହ କ୍ୟାବିନେଟର ଏକ ବଡ଼ ପ୍ରତିନିଧି ଏବଂ ବରିଷ୍ଠ ଅଧିକାରୀ ଯୋଗଦେବେ। ତାଙ୍କର ଦୁଇ ଦିନିଆ ଗସ୍ତ ସମୟରେ ସେ ଶ୍ରୀଲଙ୍କା ରାଷ୍ଟ୍ରପତି ଗୋତାବାୟା ରାଜପକ୍ଷ ଏବଂ ପ୍ରଧାନମନ୍ତ୍ରୀ ମହିନ୍ଦା ରାଜପକ୍ଷଙ୍କୁ ଭେଟିବେ। ପାକିସ୍ତାନ ଅର୍ଥନୀତି ଏବଂ ଆଭ୍ୟନ୍ତରୀଣ ସମସ୍ୟାର ସମ୍ମୁଖିନ ହେଉଥିବା ସମୟରେ ଇମ୍ରାନ ଖାନ୍ ଶ୍ରୀଲଙ୍କା ଯାଉଛନ୍ତି ।

ସୂଚନାଯୋଗ୍ୟ ୨୦୧୯ରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିମାନକୁ ପାକିସ୍ତାନ ବାୟୁସୀମାରେ ଉଡ଼ାଣ ଲାଗି ଅନୁମତି ଦେଇନଥିଲେ ଇମ୍ରାନ ସରକାର। ସେତେବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆମେରିକା ଏବଂ ସାଉଦି ଆବର ଗସ୍ତ କରିବା କାର୍ଯ୍ୟକ୍ରମ ଥିଲା। କିନ୍ତୁ ପାକିସ୍ତାନ ସେହି ସମୟରେ ନିଜ  ବାୟୁସୀମା ଖୋଲିବାକୁ ମନା କରିବା ସହ କାଶ୍ମୀରରେ କଥିତ ମାନବାଧିକାର ଉଲ୍ଲଂଘନ ଅଭିଯୋଗ ଆଣିଥିଲା।  ସାଧାରଣ ପରିସ୍ଥିତିରେ ଭିଭିଆଇପି ବିମାନ ଉଡାଣ ପାଇଁ ଦେଶଗୁଡିକୁ ଅନୁମତି ଅଛି । ତେବେ ଭିଭିଆଇପି ବିମାନକୁ ଅନୁମତିକୁ ପାକିସ୍ତାନର ମନା କରିବା ଅପମାନଜନକ ଥିଲା। ପରେ ଏହି ଘଟଣାକୁ ନେଇ ଅନ୍ତର୍ଜାତୀୟ ବେସାମରିକ ବିମାନ ଚଳାଚଳ ସଂଗଠନ ନିକଟରେ ଭାରତ ଅଭିଯୋଗ କରିଥିଲା।

0Shares
0