ଏପ୍ରିଲ ପହିଲାରୁ ରାସ୍ତାରୁ ହଟିବ ୯ ଲକ୍ଷ ସରକାରୀ ଗାଡ଼ି, ପୁରୁଣା ସ୍ଥାନରେ ଆସିବ ନୂଆ ଗାଡ଼ି
ଚାଲିବନି ୧୫ ବର୍ଷରୁ ଅଧିକ ପୁରୁଣା ଗାଡି
ନୂଆଦିଲ୍ଲୀ : ଏପ୍ରିଲ ପହିଲା ପରେ ଦେଶରେ ୧୫ ବର୍ଷରୁ ଅଧିକ ପୁରୁଣା ସରକାରୀ ଗାଡିଗୁଡିକୁ ରାସ୍ତାରୁ ହଟାଯିବ। ସେଗୁଡିକ ସ୍ଥାନରେ ନୂତନ ଯାନ ରାସ୍ତାରେ ଚାଲିବ। ଏହାଫଳରେ ରାସ୍ତାରୁ ପ୍ରାୟ ୯ ଲକ୍ଷ ସରକାରୀ ଗାଡି ଆଉ ଚାଲିବନାହିଁ। କେନ୍ଦ୍ର ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନିତିନ ଗଡକରୀ ସୋମବାର ଏ ସମ୍ପର୍କରେ ଘୋଷଣା କରିଛନ୍ତି। ଏହି ଯାନଗୁଡିକ କେନ୍ଦ୍ର ଏବଂ ରାଜ୍ୟ ସରକାର, ପରିବହନ ନିଗମ ଏବଂ ରାଷ୍ଟ୍ରାୟତ୍ତ ଉଦ୍ୟୋଗଗୁଡିକ ଦ୍ୱାରା ନିୟୋଜିତ।
ଶିଳ୍ପ ସଂଘ ଫିକି ଦ୍ବାରା ଆୟୋଜିତ ଏକ କାର୍ଯ୍ୟକ୍ରମକୁ ସମ୍ବୋଧିତ କରି ଗଡକରୀ କହିଛନ୍ତି ଯେ ଇଥାନଲ, ମିଥାନଲ, ବାୟୋ-ସିଏନଜି, ବାୟୋ-ଏଲଏନଜି ଏବଂ ବୈଦ୍ୟୁତିକ ଯାନ ବ୍ୟବହାରକୁ ସହଜ କରିବା ପାଇଁ ସରକାର ଅନେକ ପଦକ୍ଷେପ ନେଉଛନ୍ତି। ୧୫ ବର୍ଷରୁ ଅଧିକ ପୁରୁଣା ୯ ଲକ୍ଷରୁ ଅଧିକ ଯାନକୁ ସ୍କ୍ରାପରେ ପରିଣତ କରିବାକୁ ଆମେ ବର୍ତ୍ତମାନ ଅନୁମୋଦନ ଦେଇଛୁ। ଏହା ସହିତ ପ୍ରଦୂଷଣ ବୃଦ୍ଧି କରୁଥିବା ବସ୍ ଏବଂ କାରଗୁଡିକ ରାସ୍ତାରେ ଯିବା ବନ୍ଦ କରାଯାଇଛି। ସେମାନଙ୍କୁ ନୂତନ ଯାନ ସହିତ ବଦଳାଇବା ପ୍ରସ୍ତାବକୁ ଅନୁମୋଦନ କରାଯାଇଛି। ଏହାଦ୍ୱାରା ବାୟୁ ପ୍ରଦୂଷଣ ବହୁ ପରିମାଣରେ ହ୍ରାସ ପାଇବ ବୋଲି ଗଡକରୀ କହିଛନ୍ତି।
ସଡକ ପରିବହନ ଏବଂ ରାଜପଥ ମନ୍ତ୍ରଣାଳୟ ଦ୍ବାରା ଜାରି ବିଜ୍ଞପ୍ତି ଅନୁଯାୟୀ, ୧୫ ବର୍ଷ ପୁରୁଣା କେନ୍ଦ୍ର ତଥା ରାଜ୍ୟ ସରକାରୀ ଯାନଗୁଡିକ ଏପ୍ରିଲ୍ ପହିଲାରୁ ପଞ୍ଜୀକୃତ ହୋଇଯିବ। ପରିବହନ ନିଗମ ଏବଂ ସାର୍ବଜନୀନ କ୍ଷେତ୍ର ଉଦ୍ୟୋଗରେ ନିୟୋଜିତ ଯାନଗୁଡିକ ଏଥିରେ ଅନ୍ତର୍ଭୁକ୍ତ। ୨୦୨୧-୨୨ ବଜେଟରେ ଘୋଷିତ ନୀତି ଅନୁଯାୟୀ, ଘରୋଇ ଯାନ ପାଇଁ ୨୦ ବର୍ଷ ପରେ ଏବଂ ବାଣିଜ୍ୟିକ ଯାନ ପାଇଁ ୧୫ ବର୍ଷ ପରେ ଫିଟନେସ୍ ପରୀକ୍ଷା ବ୍ୟବସ୍ଥା ରହିଛି। ୨୦୨୨ ଏପ୍ରିଲ୍ ପହିଲାଠାରୁ କାର୍ଯ୍ୟକାରୀ ହୋଇଥିବା ନୂତନ ନୀତି ଅନୁଯାୟୀ ପୁରୁଣା ଯାନଗୁଡିକୁ ସ୍କ୍ରାପ୍ କରିବା ପରେ କିଣାଯାଇଥିବା ଗାଡିଗୁଡିକ ପାଇଁ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳଗୁଡିକ ୨୫ ପ୍ରତିଶତ ରିଆତି ପ୍ରଦାନ କରିବେ। ୧୫୦ କି.ମି. ପରିଧି ମଧ୍ୟରେ ପ୍ରତ୍ୟେକ ସହରରେ ଅତି କମ୍ରେ ଗୋଟିଏ ଅଟୋମୋବାଇଲ୍ ସ୍କ୍ରାପିଂ ସୁବିଧା ଉପଲବ୍ଦ କରାଯିବ।