ନୂଆଦିଲ୍ଲୀ: ସାରା ବିଶ୍ବରେ ରାଜପରିବାରଗୁଡିକ ହେଉଛନ୍ତି ସବୁଠାରୁ ବିତ୍ତଶାଳୀ। ଏଥିରେ ସାଉଦି ଆରବର ରାଜ ପରିବାର ହେଉଛି ଦୁନିଆର ସବୁଠାରୁ ଧନୀ ରାଜ ପରିବାର। ଏହାର ସମ୍ପତ୍ତି ପରିମାଣ ହେଉଛି ୧.୪ ଟ୍ରିଲିୟନ ଡଲାର ଅର୍ଥାତ୍ ପ୍ରାୟ ୧୧୧ ଲକ୍ଷ କୋଟି ଟଙ୍କା। ଏହା ସମ୍ପ୍ରତ୍ତି ବିଶ୍ବର ସବୁଠାରୁ ଧନୀ ବ୍ୟକ୍ତି ଏଲନ୍ ମସ୍କଙ୍କ ସମ୍ପତ୍ତିଠାରୁ ଚାରି ଗୁଣ ଅଧିକ। ଦୁନିଆର ୫ଟି ଧନୀ ରାଜ ପରିବାର ମଧ୍ୟରୁ ୪ଟି ଆରବ ଦେଶରୁ ଆସିଛି। ଏହି ତାଲିକାରେ ସ୍ଥାନ ପାଇଥିବା ଏକମାତ୍ର ଅଣ-ଆରବ ରାଜ ପରିବାର ହେଉଛି ବ୍ରିଟେନର ରାଜ ପରିବାର।
ସାଉଦୀ ଆରବ ରାଜପରିବାର (୧.୪ ଟ୍ରିଲିୟନ ଡଲାର)
ଦୁନିଆର ସବୁଠୁ ଧନୀ ରାଜ ପରିବାର ବିଷୟରେ କହିଲେ, ସାଉଦୀ ରାଜ ପରିବାରର ସମ୍ପତ୍ତି ସହ କେହି ସମକକ୍ଷ ହୋଇପାରିବେନାହିଁ। ଏହି ରାଜ ପରିବାର ୧୭୪୪ ପରଠାରୁ ସାଉଦି ଆରବ ଉପରେ ଶାସନ କରିଆସୁଛନ୍ତି। ଏକ ଆକଳନ ଅନୁଯାୟୀ, ରାଜ ପରିବାରର ମୋଟ ସମ୍ପତ୍ତି ମୂଲ୍ୟ ପ୍ରାୟ ୧.୪ ଟ୍ରିଲିୟନ୍ ଡଲାର ଅର୍ଥାତ୍ ପ୍ରାୟ ୧୧୧ ଲକ୍ଷ କୋଟି ଟଙ୍କା ହେବ। ଏହା ଦୁନିଆର ସବୁଠାରୁ ଧନୀ ବ୍ୟକ୍ତି ଏଲନ୍ ମସ୍କଙ୍କ ସମ୍ପତ୍ତିଠାରୁ ଚାରି ଗୁଣ ଅଧିକ। ମସ୍କଙ୍କ ନେଟ୍ ସମ୍ପତ୍ତି ମୂଲ୍ୟ ବର୍ତ୍ତମାନ ୨୫୪ ବିଲିୟନ ଡ଼ଲାର। ଯଦିଓ ଏହି ରାଜ ପରିବାରରେ ଅନେକ ସଦସ୍ୟ ଅଛନ୍ତି, କିନ୍ତୁ ରାଜା ସଲମାନ ଅଲ ସଉଦ୍ଙ୍କର ସର୍ବାଧିକ ସମ୍ପତ୍ତି ରହିଛି ।
କୁଏତ୍ ରାଜ ପରିବାର (୩୬୦ ବିଲିୟନ ଡଲାର)
କୁଏତର ଗଲ୍ଫ ଦେଶର ରାଜ ପରିବାର ହେଉଛି ବିଶ୍ୱର ଦ୍ୱିତୀୟ ଧନୀ ରାଜ ପରିବାର। ଏହାର ନେତୃତ୍ୱ ବର୍ତ୍ତମାନ କୁଏତ୍ର ଏମିର୍ ଶେଖ୍ ସବାହ ଅହମ୍ମଦ ଅଲ୍ ଜାବର୍ ଅଲ୍ ସବାହ। ଅଲ ସବାହ ରାଜ ପରିବାର ୧୭୫୨ ପରଠାରୁ କୁଏତ୍ ଉପରେ ଶାସନ କରିଆସୁଛନ୍ତି। ଏହି ରାଜ ପରିବାର ଆମେରିକାର ସମସ୍ତ ବଡ ବ୍ଲୁ-ଚିପ୍ କମ୍ପାନୀରେ ବିନିଯୋଗ କରି ବହୁ ଧନ ଅର୍ଜନ କରିଛନ୍ତି। ଏହି ରାଜ ପରିବାରର ମୋଟ ସମ୍ପତ୍ତି ୩୬୦ ବିଲିୟନ ଡଲାରରୁ ଅଧିକ। ଦୁନିଆର ସବୁଠାରୁ ଧନୀ ବ୍ୟକ୍ତି ଏଲନ୍ ମସ୍କଙ୍କ ନେଟ୍ ସମ୍ପତ୍ତି ମୂଲ୍ୟଠାରୁ ଏହା ୧୦୦ ବିଲିୟନ ଡଲାରରୁ ଅଧିକ।
କାତାର ରାଜ ପରିବାର (୩୩୫ ବିଲିୟନ ଡଲାର)
ବିଶ୍ୱର ସବୁଠାରୁ ଧନୀ ରାଜ ପରିବାର ତାଲିକାରେ କତାରର ରାଜ ପରିବାର ତୃତୀୟ ସ୍ଥାନରେ ରହିଛନ୍ତି। ଉନବିଂଶ ଶତାବ୍ଦୀର ମଧ୍ୟଭାଗରୁ କାତାର ଥାନି ରାଜବଂଶ ସେଠାରେ ଶାସନ କରିଆସୁଛି। ଏହାର ରାଜ ମୁଖ୍ୟ ଏମିର୍ ଶେଖ ତମିମ ବିନ୍ ହମାଦ ଅଲ ଥାନି ୨୦୧୩ରେ ସିଂହାସନ ଆରୋହଣ କରିଥିଲେ। ଏହି ପରିବାରର ୩୩୫ ବିଲିୟନ ଡଲାର ସମ୍ପତ୍ତି ଅଛି | ସେ ଅନେକ ରିଅଲ୍ ଇଷ୍ଟେଟ୍ ପ୍ରୋଜେକ୍ଟରେ ଅର୍ଥ ବିନିଯୋଗ କରିଛନ୍ତି। ରାଜ ପରିବାରର ନ୍ୟୁୟର୍କର ଏମ୍ପାୟାର୍ ଷ୍ଟେଟ୍ ବିଲଡିଂ, ବାରକ୍ଲେଜ୍, ବ୍ରିଟିଶ୍ ଏୟାରୱେଜ୍ ଏବଂ ଫକ୍ସୱାଗନ୍ରେ ନିବେଶ ରହିଛି।
ଆବୁଧାବିର ରାଜ ପରିବାର (୧୫୦ ବିଲିୟନ ଡଲାର)
ଅବୁଧାବି ଅଲ୍ ନାହିନ ରାଜବଂଶ ଦ୍ୱାରା ଶାସିତ। ଏହି ରାଜ ପରିବାରର ମୁଖ୍ୟ ହେଉଛନ୍ତି ଶେଖ୍ ଖଲିଫା ବିନ୍ ଜାଏଦ ଅଲ୍ ନାହାନ, ଆବୁଧାବିର ଏମିର ଏବଂ ୨୦୦୪ରୁ ୟୁଏଇର ରାଷ୍ଟ୍ରପତି। ସେ ୬୯୬ ବିଲିୟନ ଡଲାରରୁ ଅଧିକ ମୂଲ୍ୟର ସମ୍ପତ୍ତିକୁ ନିୟନ୍ତ୍ରଣ କରୁଥିବା ଆବୁଧାବି ନିବେଶ ପ୍ରାଧିକରଣର ଅଧ୍ୟକ୍ଷ ରହିଛନ୍ତି। ଆବୁଧାବିର ରାଜ ପରିବାରର ମୋଟ ସମ୍ପତ୍ତି ୧୫୦ ବିଲିୟନ ଡଲାର । ଏହାର ଅଧିକାଂଶ ଅର୍ଥ ତେଲରୁ ଆସିଥାଏ। ଲଣ୍ଡନରେ ତାଙ୍କର ୭.୧ ବିଲିୟନ ଡଲାରର ରିଏଲ୍ ଇଷ୍ଟେଟ୍ ସମ୍ପତ୍ତି ରହିଛି। ଏହି ପରିବାର ଦୁନିଆର ସବୁଠାରୁ ଧନୀ ରାଜ ତାଲିକାରେ ଚତୁର୍ଥ ସ୍ଥାନରେ ରହିଛି।
ବ୍ରିଟିଶ ରାଜ ପରିବାର (୮୮ ବିଲିୟନ ଡଲାର)
ବ୍ରିଟିଶ ରାଜ ପରିବାରର ଦାୟିତ୍ବ ବର୍ତ୍ତମାନ ପର୍ଯ୍ୟନ୍ତ ରାଣୀ ଏଲିଜାବେଥ୍ଙ୍କ ହାତରେ ଥିଲା। ତାଙ୍କ ମୃତ୍ୟୁ ପରେ ତାଙ୍କର ପୁଅ ଚାର୍ଲ୍ସ ରାଜା ହେବେ। ଯଦିଓ ଏହି ପରିବାର ଦୁନିଆର ସବୁଠାରୁ ଧନୀ ରାଜ ତାଲିକାରେ ପଞ୍ଚମ ସ୍ଥାନରେ ରହିଛି, କିନ୍ତୁ ଏହା ଦୁନିଆର ସବୁଠାରୁ ପ୍ରଭାବଶାଳୀ ରାଜ ପରିବାର । ଫୋର୍ବସର ଏକ ରିପୋର୍ଟ ଅନୁଯାୟୀ ବ୍ରିଟିଶ ରାଜ ପରିବାରର ସମ୍ପତ୍ତି ୮୮ ବିଲିୟନ ଡଲାର ହେବ। ଏହାର ଅଧିକାଂଶ ଅର୍ଥ ସାର୍ବଭୌମ ଅନୁଦାନରୁ ଆସିଥାଏ। ଏଥିସହ ରାଜ ପରିବାର ଅନେକ ରିଅଲ ଇଷ୍ଟେଟ୍ ପ୍ରକଳ୍ପରେ ଅର୍ଥ ବିନିଯୋଗ କରିଛି।
