ଦକ୍ଷିଣ ଆଫ୍ରିକା ବିପକ୍ଷ ଟି-୨୦ ସିରିଜ ପୂର୍ବରୁ ଭାରତୀୟ ଦଳକୁ ବଡ଼ ଝଟକା, ବାଦ ପଡ଼ିଲେ କେ.ଏଲ ରାହୁଲ ଓ କୁଲଦୀପ ଯାଦବ

ମୁମ୍ବାଇ: ଦକ୍ଷିଣ ଆଫ୍ରିକା ବିପକ୍ଷ ଟି-୨୦ ସିରିଜ ପୂର୍ବରୁ ଭାରତୀୟ ଦଳକୁ ଲାଗିଛି ଏକ ବଡ଼ ଝଟକା । ଆହତ କାରଣରୁ ସଂପୂର୍ଣ୍ଣ ସିରିଜରୁ ବାଦ ପଡ଼ିଛନ୍ତି ଅଧିନାୟକ କେ.ଏଲ ରାହୁଲ ଓ ସ୍ପିନର କୁଲଦୀପ ଯାଦବ । ବିସିସିଆଇ ପକ୍ଷରୁ ଏହି ସୂଚନା ଦିଆଯାଇଛି । ତେଣୁ ଆଗାମୀ ୧୨ ତାରିଖରେ କଟକ ବାରବାଟୀ ଷ୍ଟାଡିୟମରେ ଖେଳାଯିବାକୁ ଥିବା ଭାରତ- ଦକ୍ଷିଣ ଆଫ୍ରିକା ମ୍ୟାଚରେ ରାହୁଲ ନଜର ଆସିବେ ନାହିଁ ।

ଆହତ କାରଣରୁ ରାହୁଲ ଓହରିବା ପରେ ରିଷଭ ପନ୍ତ ଟିମ୍ ଇଣ୍ଡିଆର ଅଧିନାୟକ ଦାୟିତ୍ୱ ତୁଲାଇବେ। ହାର୍ଦ୍ଦିକ ପାଣ୍ଡ୍ୟା ଉପଅଧିନାୟକ ରହିବେ । ତେବେ କେଏଲ ରାହୁଲ ଓ କୁଲଦୀପ ଯାଦବଙ୍କ ସ୍ଥାନରେ ଆଉ କୌଣସି ଖେଳାଳିଙ୍କୁ ନିଆଯାଇନାହିଁ । ଏହାପୂର୍ବରୁ ବିରାଟ କୋହଲି, ରୋହିତ ଶର୍ମାଙ୍କୁ ଏହି ସିରିଜରୁ ବିଶ୍ରାମ ଦିଆଯାଇଥିଲା । ଆଉ ଏବେ ରାହୁଲ ସିରିଜରୁ ବାଦ୍ ପଡିବା ପରେ ଦଳର ଟପ୍-୩ ବ୍ୟାଟ୍ସମ୍ୟାନ୍ ଏହି ସିରିଜରେ ଦେଖିବାକୁ ମିଳିବେନି । ସେହିପରି ଷ୍ଟାର ପ୍ଲେୟାର ଶ୍ରେୟାସ ଆୟର, ସୂର୍ଯ୍ଯକୁମାର ଯାଦବ ମଧ୍ୟ ଏହି ସିରିଜରେ ସ୍ଥାନ ପାଇନାହାଁନ୍ତି । ତେଣୁ ଦକ୍ଷିଣ ଆଫ୍ରିକା ବିପକ୍ଷରେ ଟିମ୍ ଇଣ୍ଡିଆକୁ ମ୍ୟାଚ୍ ଜିତିବାକୁ ଅଧିକ କସରତ କରିବାକୁ ପଡିପାରେ।

Leave a comment