ଏଣିକି ୪୮୮ବର୍ଗ ପୂର୍ଣ୍ଣ ଅନୁଦାନ ପ୍ରାପ୍ତ ଶିକ୍ଷକଙ୍କ ବେତନ ସମସ୍ୟା ଦୂର ହେବ

ଭୁବନେଶ୍ୱର: ଏଣିକି ୪୮୮ ବର୍ଗ ପୂର୍ଣ୍ଣ ଅନୁଦାନ ପ୍ରାପ୍ତ ଶିକ୍ଷକଙ୍କ ବେତନ ସମସ୍ୟା ଦୂର ହେବ। ପୂର୍ବ ପରି ବେତନ ମିଳିବାରେ ଆଉ ସମସ୍ୟା ହେବନି। ବିଳମ୍ବ ମଧ୍ୟ ହେବ ନାହିଁ। ସ୍କୁଲ ଓ ଗଣଶିକ୍ଷା ବିଭାଗ ପକ୍ଷରୁ ଏନେଇ ବିଧିବଦ୍ଧ ଯୋଜନା ପ୍ରସ୍ତୁତ ହୋଇଛି। ପୂର୍ବର ବ୍ୟବସ୍ଥା ଅନୁଯାୟୀ ଦରମା ପାଇଁ ଆଉ ଉପ ଜିଲ୍ଲାପାଳ କିମ୍ବା ଅତିରିକ୍ତ ଜିଲ୍ଲାପାଳଙ୍କ ମଞ୍ଜୁରୀକୁ ଅପେକ୍ଷା କରିବାକୁ ପଡ଼ିବନି। ଏଣିକି ବିଭାଗ ସିଧାସଳଖ ସମ୍ପୃକ୍ତ ଶିକ୍ଷକଙ୍କ ଦରମା ଓ ଅନ୍ୟାନ୍ୟ ଆନୁଷଙ୍ଗିକ ବିଲ୍‍ ସମ୍ପର୍କିତ କ୍ଷେତ୍ରରେ ହସ୍ତକ୍ଷେପ କରିବ। ଏନେଇ ବିଭାଗ ପକ୍ଷରୁ ସୂଚନା ଦିଆଯାଇଛି।

ମିଳିଥିବା ସୂଚନା ଅନୁଯାୟୀ, ରାଜ୍ୟରେ ୪୮୮ ବର୍ଗ ପୂର୍ଣ୍ଣ ଅନୁଦାନ ପ୍ରାପ୍ତ ବେସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟଗୁଡ଼ିକ ପାଇଁ ଉଦ୍ଦିଷ୍ଟ ବେତନ ସମ୍ବନ୍ଧୀୟ ବିଲ୍‍ ଗୁଡ଼ିକରେ ଉପ-ଜିଲ୍ଲାପାଳ କିମ୍ବା ଅତିରିକ୍ତ ଜିଲ୍ଲାପାଳଙ୍କ ଦ୍ୱାରା କାଉଣ୍ଟର ଦସ୍ତଖତ କରିବାର ପ୍ରଚଳିତ ବିଧି ବ୍ୟବସ୍ଥାକୁ ଉଚ୍ଛେଦ କରିବା ପାଇଁ ସରକାର ସ୍ଥିର କରିଛନ୍ତି। ଏହା ଦ୍ୱାରା ସମ୍ପୃକ୍ତ ଉଚ୍ଚ ମାଧ୍ୟମିକ ବିଦ୍ୟାଳୟଗୁଡ଼ିକରେ ଶିକ୍ଷାଦାନ କରୁଥିବା ଅଧ୍ୟାପକ ଏବଂ ଅଧ୍ୟାପିକାମାନଙ୍କ ବିଭିନ୍ନ ବିଲ୍‍ଗୁଡ଼ିକର ନିର୍ଗମନ ପ୍ରକ୍ରିୟା ଅଧିକ ସୁଗମ ହେବ ବୋଲି ବିଭାଗ ଦର୍ଶାଇଛି।