ନୂଆଦିଲ୍ଲୀ : ୨୦୨୧-୨୨ ଆର୍ଥିକବର୍ଷରେ କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ (ଇପିଏଫ୍ଓ) ସଦସ୍ୟଙ୍କୁ ମିଳିଛି କମ୍ ସୁଧହାର। ବାର୍ଷିକ ୮.୧ % ସୁଧହାର ନିଷ୍ପତ୍ତି ଇପିଏଫ୍ ସଦସ୍ୟଙ୍କୁ ହାରାଶ କରିଛି। ଏହାକୁ ଦୃଷ୍ଟିରେ ରଖି ଇପିଏଫ୍ଓ ଏବେ ନୂଆ ରଣନୀତି ପ୍ରସ୍ତୁତ କରିବାକୁ ଯାଉଛି। ଏହି ଅନୁଯାୟୀ ଇକ୍ୱିଟିରେ ନିବେଶ ବଢ଼ାଇବାକୁ ଯାଉଛି ଇପିଏଫ୍ଓ। ଯାହାଫଳରେ ସଦସ୍ୟଙ୍କୁ ମିଳିବ ଅଧିକ ସୁଧ ହାର। ଯୋଜନାନୁଯାୟୀ, ଇପିଏଫ୍ଓ ଇକ୍ୱିଟିରେ ନିବେଶ ପରିମାଣକୁ ବର୍ତ୍ତମାନର ୧୫ ପ୍ରତିଶତରୁ ୨୫ ପ୍ରତିଶତକୁ ବୃଦ୍ଧି କରିବ। ଏହାଦ୍ବାରା ଇପିଏଫ୍ ସଦସ୍ୟମାନେ ସେମାନଙ୍କର ଅର୍ଥ ଯୋଗଦାନ ଉପରେ ଉତ୍ତମ ସୁଧ ହାର ପାଇବା ସୁନିଶ୍ଚିତ ହୋଇପାରିବଳ ଯାହା ସଂଗଠନର ମୁଖ୍ୟ ଲକ୍ଷ୍ୟ।
ଇକ୍ୱିଟିରେ ନିବେଶ ପରିମାଣ ବୃଦ୍ଧି କରିବା ନେଇ ସଂଗଠନର ଫାଇନାନ୍ସ ଇନଭେଷ୍ଟମେଣ୍ଟ କମିଟିକୁ ଏ ସମ୍ପର୍କରେ ପ୍ରସ୍ତାବ ଦିଆଯାଇସାରିଛି। କିମଟି ଏ ଦିଗରେ ଅଗ୍ରସର ହେବାକୁ ସବୁଜ ସଙ୍କେତ ଦେଇସାରିଛି। ଇପିଏଫ୍ଓର ସର୍ବୋଚ୍ଚ ନୀତି ନିର୍ଦ୍ଧାରଣକାରୀ ସଂସ୍ଥା କେନ୍ଦ୍ରୀୟ ଟ୍ରଷ୍ଟି ବୋର୍ଡ (ସିବିଟି) ବୈଠକରେ ଏ ସମ୍ପର୍କିତ ପ୍ରସ୍ତାବକୁ ସବୁଜ ସଙ୍କେତ ମିଳିବା ଆଶା କରାଯାଉଛି। ଏଠାରେ ସୂଚନାଯୋଗ୍ୟ ଯେ, ପାଇବା ସମ୍ଭବ। ସମ୍ପ୍ରତି ଇପିଏଫ୍ ମାଧ୍ୟମରେ ସଦସ୍ୟଙ୍କ ଯୋଗଦାନରୁ ସଂଗୃହିତ ଅର୍ଥର ୧୫ ପ୍ରତିଶତ ଇକ୍ୱିଟିରେ ବିନିଯୋଗ ହୋଇଥିବାବେଳେ ଅବଶିଷ୍ଟ ଡେବ୍ଟ ବା ଋଣରେ ବିନିଯୋଗ ହୋଇଛି।
ତେବେ ଯୋଜନାନୁଯାୟୀ, ଇପିଏଫ୍ସ ଏହାର ଇକ୍ୱିଟିରେ ନିବେଶକୁ ପର୍ଯ୍ୟାୟକ୍ରମେ ବୃଦ୍ଧି ଘଟାଇବ। ପ୍ରାରମ୍ଭରେ ୧୫ ରୁ ୨୦ ପ୍ରତିଶତ ଅର୍ଥ ଇକ୍ବିଟିରେ ନିବେଶ କରାଯିବାକୁ ଥିବାବେଳେ ପରବର୍ତ୍ତୀ ସମୟରେ ଏହାକୁ ୨୦ ରୁ ୨୫ ପ୍ରତିଶତକୁ ବୃଦ୍ଧି କରାଯିବ। ଋଣ ଉତ୍ପାଦଗୁଡିକରେ ଇପିଏଫ୍ଓ ନିବେଶ ମାତ୍ର ୭-୮ ପ୍ରତିଶତ ମଧ୍ୟରେ ରହିଛି। ୨୦୨୧-୨୨ରେ ଇପିଏଫ୍ ସୁଧ ହାର ୮.୧ ପ୍ରତିଶତ ରହିଥିବାବେଳେ ଇକ୍ୱିଟି ନିବେଶରୁ ରିଟର୍ଣ୍ଣ ପ୍ରାୟ ୧୪ ପ୍ରତିଶତ ରହିଥିଲା। ଯାହା ପରୋକ୍ଷରେ ଇକ୍ବିଟି ନିବେଶରୁ ସଦସ୍ୟଙ୍କୁ ଅଧିକ ସୁଧ ହାର ପ୍ରଦାନକୁ ସୁନିଶ୍ଚିତ କରୁଛି। କ୍ଲାଏଣ୍ଟ ଏବଂ ଆର୍ଥିକ କାରବାରର ପରିମାଣ ଦୃଷ୍ଟିରୁ ଇପିଏଫ୍ଓ ହେଉଛି ବିଶ୍ବ ର ସର୍ବ ବୃହତ ସାମାଜିକ ସୁରକ୍ଷା ସଂଗଠନ। ବର୍ତ୍ତମାନ ଏହା ତା’ର ସଦସ୍ୟମାନଙ୍କର ୨୪.୭୭ କୋଟି ଆକାଉଣ୍ଟ (ବାର୍ଷିକ ରିପୋର୍ଟ ୨୦୧୯-୨୦) ପରିଚାଳନା କରୁଛି।
