ଆଦାନୀ ଗ୍ରୁପ୍ରେ ଲାଗିଛି ଇପିଏଫ୍ଓ ପାଣ୍ଠି, ଇଟିଏଫ୍ ମାଧ୍ୟମରେ ଗ୍ରୁପର ଦୁଇଟି ଶେୟାରରେ ହୋଇଛି ନିବେଶ
ଇଟିଏଫ୍ରେ ପାଣ୍ଠି ବିନିଯୋଗରେ ଇପିଏଫ୍ଓକୁ କମ୍ ରିଟର୍ଣ୍ଣ ମିଳିବ
ନୂଆଦିଲ୍ଲୀ : ହିଣ୍ଡେନ୍ବର୍ଗ ରିପୋର୍ଟ ପ୍ରକାଶ ପାଇବା ପରଠାରୁ ଆଦାନୀ ଗ୍ରୁପ୍ ଉପରେ ବଜ୍ର ପଡିଛି। କ୍ରମାଗତ ଭାବେ ଗ୍ରୁପ୍ର ବିଭିନ୍ନ କମ୍ପାନୀଗୁଡିକର ଶେୟାର ମୂଲ୍ୟରେ ହ୍ରାସ ଜାରି ରହିଛି। ତେବେ ଏଲ୍ଆଇସିଠାରୁ ଆରମ୍ଭ କରି ଯେଉଁ ସବୁ ସରକାରୀ କମ୍ପାନୀ ଏବଂ ସଂସ୍ଥାର ଅର୍ଥ ଆଦାନୀ ଗ୍ରୁପ୍ରେ ନିବେଶ କରାଯାଇଛି ସେମାନେ ମଧ୍ୟ ସମାନ ଭାବେ କ୍ଷତି ସହିବାରେ ଲାଗିଛନ୍ତି। ଆଶ୍ଚର୍ଯ୍ୟର କଥା ହେଉଛି ଅଣସଂଗଠିତ କ୍ଷେତ୍ରରେ କାର୍ଯ୍ୟରତ କର୍ମଚାରୀମାନଙ୍କର ପାଣ୍ଠିର ପରିଚାଳକ କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ (ଇପିଏଫ୍ଓ)ର ଅର୍ଥ ମଧ୍ୟ ଆଦାନୀ ଗ୍ରୁପରେ ନିବେଶ କରାଯାଇଛି।
ଇପିଏଫ୍ଓର ଏହି ଅର୍ଥକୁ ଇଟିଏଫ୍ ମାଧ୍ୟମରେ ଆଦାନୀ ଗ୍ରୁପର ଦୁଇଟି ଶେୟାରରେ ନିବେଶ କରାଯାଇଛି। ତେଣୁ ବର୍ତ୍ତମାନ ଷ୍ଟକ୍ ବଜାରରେ ଯେପରି ସ୍ଥିତି ଜାରି ରହିଛି ଏବଂ ହିଣ୍ଡେନ୍ବର୍ଗର ନକାରାତ୍ମକ ରିପୋର୍ଟ ପରେ ଆଦାନୀ ଗ୍ରୁପର ଶେୟାର ମୂଲ୍ୟରେ ଯେଉଁଭଳି ଭାବେ ହ୍ରାସ ଘଟୁଛି ସେଥିରେ ଇପିଏଫ୍ଓ ସଦସ୍ୟମାନଙ୍କର ଅର୍ଥ ସୁରକ୍ଷିତ ରହିଛି ତ?, ଯାହା ଏବେ ବଡ଼ ପ୍ରଶ୍ନ। କଂଗ୍ରେସ ନେତା ରାହୁଲ ଗାନ୍ଧୀ ସୋମବାର ଏହି ପ୍ରଶ୍ନ ଉଠାଇଛନ୍ତି। ହିଣ୍ଡେନ୍ବର୍ଗ ଝଡ଼ରେ କ୍ରମାଗତ ଭାେବ ତିନି ମାସ ହେବ ଆଦାନୀ ଗ୍ରୁପର ଶେୟାର ମୂଲ୍ୟରେ ବୃହତ୍ ହ୍ରାସ ଘଟିବାରେ ଲାଗିଛି। ଖୁବ୍ ଶୀଘ୍ର ଇପିଏଫ୍ଓ ଏହାର ସୁଧ ହାର ଘୋଷଣା କରିବାକୁ ଯାଉଛି। ତେଣୁ ଏଭଳି ପରିସ୍ଥିତିରେ ଇପିଏଫ୍ଓର ୬ କୋଟି ନିବେଶକଙ୍କୁ କେମିତି ଅଧିକ ସୁଧହାର ମିଳିବ ସେ ନେଇ ସଦସ୍ୟ ଆଶଙ୍କାରେ।
ଜାନୁଆରୀ ୨୪ରେ ଆଦାନୀ ଗ୍ରୁପ୍ ବିଷୟରେ ହିଣ୍ଡେନ୍ବର୍ଗର ରିପୋର୍ଟ ଆସିଥିଲା। ସେଥିରେ ଆଦାନୀ ଗ୍ରୁପର ବଜାର ପୁଞ୍ଜି ଅଧାରୁ ଅଧିକ ହ୍ରାସ ପାଇଲା। ଏହି କାରଣରୁ, ବିଶ୍ବର ବହୁ ବଡ ନିବେଶକ ଆଦାନୀ ଗ୍ରୁପ୍ଠାରୁ ନିଜକୁ ଦୂରେଇ ରଖିଥିଲେ, କିନ୍ତୁ ଦେଶର ସର୍ବବୃହତ ଅବସର ପାଣ୍ଠି ପରିଚାଳକ ଇପିଏଫ୍ଓ ଆଦାନୀ ଗ୍ରୁପର ସେୟାରରେ ନିବେଶ ନେଇ ଆତ୍ମବିଶ୍ୱାସୀ ରହିଲା। ବେସରକାରୀ କ୍ଷେତ୍ରରେ କାର୍ଯ୍ୟ କରୁଥିବା କୋଟି କୋଟି ଲୋକଙ୍କ ଇପିଏଫ୍ ପରିଚାଳନା କରୁଥିବା ଏହି ସଂଗଠନ ଏବେ ମଧ୍ୟ ଆଦାନୀ ଗ୍ରୁପ୍ର ଶେୟାରରେ ଅର୍ଥ ବିନିଯୋଗ କରୁଛି। ଏକ ରିପୋର୍ଟ ଅନୁଯାୟୀ, ଇପିଏଫ୍ଓ କ୍ରମାଗତ ଭାବରେ ଆଦାନୀ ଗ୍ରୁପର ଫ୍ଲାଗସିପ୍ କମ୍ପାନୀ ଆଦାନୀ ଏଣ୍ଟରପ୍ରାଇଜେସ୍ ଏବଂ ଆଦାନୀ ବନ୍ଦର ଏବଂ ସ୍ୱତନ୍ତ୍ର ଅର୍ଥନୈତିକ ଜୋନ୍ (ଏପିଏସ୍ଜେ)ରେ ପାଣ୍ଠି ବିନିଯୋଗ କରୁଛି। ଏହି ପ୍ରକ୍ରିୟା ୨୦୨୩ ସେପ୍ଟେମ୍ବର ପର୍ଯ୍ୟନ୍ତ ଜାରି ରହିବ।
ଇପିଏଫ୍ଓ ଏହାର ମୋଟ ବଳକା ରାଶିର ୧୫% ଏନ୍ଏସ୍ଇ (ନ୍ୟାସନାଲ ଷ୍ଟକ୍ ଏକ୍ସଚେଞ୍ଜ) ଏବଂ ବିଏସ୍ଇ (ବମ୍ବେ ଷ୍ଟକ୍ ଏକ୍ସଚେଞ୍ଜ) ସହିତ ସଂଯୁକ୍ତ ଇଟିଏଫ୍ରେ ବିନିଯୋଗ କରିଥାଏ। ଆଦାନୀ ଏଣ୍ଟରପ୍ରାଇଜେସ୍ ଏବଂ ଆଦାନୀ ବନ୍ଦରଗୁଡିକ ଏନ୍ଏସ୍ଇ ନିଫ୍ଟିରେ ସାମିଲ। ୨୦୧୫ଠାରୁ ଆଦାନୀ ବନ୍ଦର ଏହାର ଏକ ଅଂଶ ହୋଇଥିବାବେଳେ ଆଦାନୀ ଏଣ୍ଟରପ୍ରାଇଜେସ୍ ସେପ୍ଟେମ୍ବର ୨୦୨୨ଠାରୁ ଅନ୍ତର୍ଭୁକ୍ତ ହୋଇଥିଲା। ୨୦୨୩ ସେପ୍ଟେମ୍ବର ୬ ପର୍ଯ୍ୟନ୍ତ ଏହି ଦୁଇ ସେୟାର ନିଫ୍ଟି ୫୦ ରେ ରହିବେ। ଏହିପରି ଭାବେ ନିଫ୍ଟି ଇଟିଏଫ୍ରେ ବିନିଯୋଗ ହୋଇଥିବା ଇପିଏଫ୍ଓର ପାଣ୍ଠି ଆଦାନୀ ଏଣ୍ଟରପ୍ରାଇଜେସ୍ ଏବଂ ଆଦାନୀ ବନ୍ଦରକୁ ଚାଲିଯିବ | ହିଣ୍ଡେନ୍ବର୍ଗ ରିସର୍ଚ୍ଚ ରିପୋର୍ଟ ପରେ ତିନିମାସ ମଧ୍ୟରେ ଆଦାନୀ ଏଣ୍ଟରପ୍ରାଇଜେସ୍ର ଷ୍ଟକ୍ ୫୫ ପ୍ରତିଶତ ଏବଂ ଆଦାନୀ ବନ୍ଦରର ଷ୍ଟକ୍ ୨୩ ପ୍ରତିଶତ ହ୍ରାସ ପାଇଛି। ଏହି ସ୍ଥିତି ୨୦୨୨-୨୩ ପାଇଁ ଇପିଏଫ୍ଓର ସୁଧ ହାର ଉପରେ ମଧ୍ୟ ପ୍ରଭାବ ପକାଇପାରେ। ଏହାର କାରଣ ଇଟିଏଫ୍ରେ କରାଯାଇଥିବା ପାଣ୍ଠି ବିନିଯୋଗରେ ଇପିଏଫ୍ଓ ଏବେ କମ୍ ରିଟର୍ଣ୍ଣ ପାଇବ।
ଆଜି ଘୋଷଣା ହେବ ଇପିଏଫ୍ ସୁଧହାର
ସୋମବାରଠାରୁ ଆରମ୍ଭ ହୋଇଛି କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ (ଇପିଏଓଫ୍) କେନ୍ଦ୍ରୀୟ ଟ୍ରଷ୍ଟି ବୋର୍ଡ (ସିବିଟି)ର ଦୁଇଦିନିଆ ବୈଠକ। ଏହି ବୈଠକର ଦ୍ବିତୀୟ ଦିନ ଅର୍ଥାତ୍ ମଙ୍ଗଳବାର ସଂଗଠନ ବର୍ଷ ୨୦୨୨-୨୩ ପାଇଁ ଇପିଏଫ୍ ଜମା ଉପରେ ସୁଧ ହାର ଘୋଷଣା କରିବାର ସମ୍ଭାବନା ରହିଛି। ଗତଥର ସୁଧହାର ଚାରି ଦଶନ୍ଧି ମଧ୍ୟରେ ସବୁଠାରୁ କମ୍ ୮.୧ ପ୍ରତିଶତ ରହିଥିଲା। ୧୯୭୭-୭୮ ପରଠାରୁ ଏହା ସର୍ବନିମ୍ନ ଥିଲା। ଅପରପକ୍ଷେ କର୍ମଚାରୀ ପେନ୍ସନ୍ ଯୋଜନା ୧୯୯୫ ଅନ୍ତର୍ଗତ ଗ୍ରାହକଙ୍କୁ ଅଧିକ ପେନ୍ସନ୍ ଚୟନ କରିବାକୁ ଇପିଏଫ୍ଓ ଏହାର ଗ୍ରାହକଙ୍କୁ ମେ’ ୩ ତାରିଖ ପର୍ଯ୍ୟନ୍ତ ଅଧିକ ପେନ୍ସନ୍ ଚୟନ କରିବାକୁ ବିକଳ୍ପ ଦେଇଛି।
