ମହାମାରୀ ସମୟରେ ଡିଜିଟାଲ୍ ବିବାହ: ଗୁଗ୍‌ଲ ମିଟ୍‌ରେ ଲାଇଭ୍‌ରେ ରହିବେ ଅତିଥି, ଜୋମାଟୋରେ ଘରେ ପହଞ୍ଚିବ ଭୋଜି

ପଶ୍ଚିମବଙ୍ଗ: ଦେଶରେ ଆରମ୍ଭ ହୋଇଛି କରୋନାର ତୃତୀୟ ଲହର। ତେବେ କରୋନାର ପ୍ରଥମ ଲହରରୁ ହିଁ ବାହାଘର ଶୈଳୀରେ ପରିବର୍ତ୍ତନ ଦେଖିବାକୁ ମିଳିଛି। ସଂକ୍ରମଣକୁ ଦୃଷ୍ଟିରେ ରଖି ନିରାଡମ୍ବରରେ ବାହାଘରଗୁଡ଼ିକ ଅନୁଷ୍ଠିତ ହେଉଛି, ଯାହା ଏଯାବତ୍ ଜାରି ଅଛି। ପଶ୍ଚିମବଙ୍ଗର ସନ୍ଦୀପନ ସରକାର ଓ ଅଦିତି ଦାସଙ୍କ ବାହାଘର ଏବେ ଚର୍ଚ୍ଚାର ପ୍ରସଙ୍ଗ ହୋଇଛି। ଜାନୁଆରୀ ୨୪ରେ ଅନୁଷ୍ଠିତ ହେବାକୁ ଥିବା ସେମାନଙ୍କ ବାହାଘରରେ ଅତିଥିମାନେ ଗୁଗ୍‌ଲ ମିଟ୍‌ରେ ଯୋଗ ଦେବେ। ତା’ସହ ଭର୍ଚୁଆଲରେ ଯୋଗ ଦେଇଥିବା ଅତିଥିମାନଙ୍କୁ ଜୋମାଟୋ ମାଧ୍ୟମରେ ଖାଦ୍ୟ ପହଞ୍ଚାଇବା ପାଇଁ ବନ୍ଦୋବସ୍ତ କରାଯାଇଛି। ସେହିପରି ସମୁଦାୟ ୨୫୦ ଜଣ ଅତିଥି ଗୁଗ୍‌ଲ ମିଟ୍‌ରେ ଯୋଗ ଦେବେ। ଅବଶ୍ୟ ଏହାକୁ ସେ ସମ୍ପୂର୍ଣ୍ଣ ଡିଜିଟାଲ ବାହାଘର ବୋଲି କହି ନାହାନ୍ତି। କାରଣ ତାଙ୍କ ବାହାଘର ଦିନ ହିଁ ୧୦୦ରୁ ୧୨୦ ଜଣ ଅତିଥି ମଣ୍ଡପରେ ଉପସ୍ଥିତ ରହିବେ। ତେବେ ସନ୍ଦୀପନ କରୋନାରେ ଆକ୍ରାନ୍ତ ହେବା ପରେ ବାହାଘରକୁ ନେଇ ଏଭଳି ଏକ ଚିନ୍ତା ତାଙ୍କ ମନକୁ ଆସିଥିବା ସେ କହିଛନ୍ତି ।

Leave a comment