ସମ୍ପତ୍ତି କାଗଜପତ୍ର ନଦେବାରୁ ଶ୍ୱଶୁରଙ୍କୁ କଟୁରୀରେ ହାଣିଲେ ବୋହୂ

କେନ୍ଦ୍ରାପଡା : ସମ୍ପତି ପାଇଁ ବୋହୂ ଶ୍ୱଶୁରଙ୍କୁ କଟୁରୀରେ ହାଣି ଲହୁଲୁହାଣ କରିଥିବା ନେଇ ପାଟକୁରା ଥାନା, କେନ୍ଦ୍ରାପଡା ଏସ୍ପି, ପୋଲିସ ଡିଜିଙ୍କୁ ଅଭିଯୋଗ ହୋଇଛି । ଅଭିଯୋଗ ମୁତାବକ, ପାଟକୁରା ଥାନା ଅଧିନ ଟିକନପୁର ଅଂଚଳର ୬୮ ବର୍ଷୀୟ ବ୍ରଜକିଶୋର ବାରିକ ଏହିଭଳି ଅଭିଯୋଗ କରିଛନ୍ତି । ଶୁକ୍ରବାର ସକାଳ ୮ ସମୟରେ ତାଙ୍କର ବଡ଼ପୁଅ ମହେନ୍ଦ୍ର ବାରିକ ତାଙ୍କୁ ଜମିର କାଗଜପତ୍ର ମାଗିଥିଲେ । ହେଲେ ସେ ତାକୁ ଜମି କାଗଜପତ୍ର କ’ଣ କରିବୁ ବୋଲି ପଚାରିଥିଲେ । ମହେନ୍ଦ୍ର ଗୋଟିଏ ଲୋନ୍‌ କରିବ ବୋଲି କହିଥିଲା । ଏଥିରେ ବ୍ରଜକିଶୋର ରାଜି ହୋଇନଥିଲେ । ଆଉ କାଗଜପତ୍ର ଦେବା ପାଇଁ ରୋକଠୋକ ମନାକରି ଦେଇଥିଲେ । ଫଳରେ ପୁଅ ମହେନ୍ଦ୍ର ତାଙ୍କୁ ବିଭିନ୍ନ ଅଶ୍ଲୀଳ ଭାଷାରେ ଗାଳିଗୁଲଜ କରିବା ସହ ମାଡ଼ ମାରିଥିଲେ ।

ମାଡ଼ ମାରିବା ଯୋଗୁ ବ୍ରଜକିଶୋର ତଳେ ପଡିଯାଇଥିଲେ । ଏହି ସମୟରେ ମହେନ୍ଦ୍ରର ପତ୍ନୀ ବବିତା ପଟ୍ଟନାୟକ କଟୁରିରେ ତାଙ୍କ ମୁଣ୍ଡକୁ ଆକ୍ରମଣ କରିଥିଲେ । କଟୁରି ମୁଣ୍ଡରେ ଆଉ ହାତରେ ବାଜିବାରୁ ବ୍ରଜକିଶୋର ରକ୍ତାତ ହୋଇ ତଳେ ପଡି ରହିଲେ । ଏହାପରେ ବ୍ରଜକିଶୋରଙ୍କ ଘରେ ପଶି ପୁଅବୋହୂ ତାଙ୍କ ବାକ୍ସ ଭାଙ୍ଗି ୫ ଭରି ସୁନା ଆଉ ୧୨ ହଜାର ଟଙ୍କା ନେଇଯାଇଥିଲେ । ବ୍ରଜକିଶୋର ରକ୍ତାତ ଅବସ୍ଥାରେ ତଳେ ପଡିଥିବା ଦେଖି ସାନପୁଅ ଉଦ୍ଧାର କରି କେନ୍ଦ୍ରାପଡା ମୁଖ୍ୟ ଚିକିତ୍ସାଳୟରେ ଚିକିତ୍ସା ପାଇଁ ଭର୍ତ୍ତି କରିଥିଲା । ବର୍ତ୍ତମାନ ବ୍ରଜକିଶୋର ବହୁତ ଭୟଭୀତ ଅବସ୍ଥାରେ ଅଛନ୍ତି । ତାଙ୍କର ଜୀବନ ପ୍ରତି ବିପଦ ରହିଥିବା ନେଇ ଏତଲାରେ ଦର୍ଶାଇଛନ୍ତି । ପୁଅ ବୋହୂଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇ ପାଟକୁରା ଥାନା ଅଧିକାରୀ, ପୋଲିସ ଡିଜି, କେନ୍ଦ୍ରାପଡା ଏସ୍ପି, ଗୃହ ସଚିବ, ୫ଟି ସଚିବ ଏବଂ ଗୃହମନ୍ତ୍ରୀଙ୍କୁ ଲିଖିତ ଅଭିଯୋଗ କରିଛନ୍ତି ।

Leave a comment