ଭାରତ ପାଇଁ ବଢିଲା ଚିନ୍ତା: ଶ୍ରୀଲଙ୍କାରେ ପହଞ୍ଚିଲା ଚୀନର ଗୁଇନ୍ଦା ଜାହଜ ‘ୟୁୱାନ ୱାଙ୍ଗ-୫’

ନୂଆଦିଲ୍ଲୀ: ଭାରତର କଡ଼ା ଚେତାବନୀ ସତ୍ତ୍ୱେ ଶ୍ରୀଲଙ୍କାରେ ପହଞ୍ଚିଲା ଚୀନର ସାଟେଲାଇଟ୍‌ ଓ ମିସାଇଲ୍‌ ଟ୍ରାକିଂ ଜାହାଜ। ଆଜି ସକାଳେ ଶ୍ରୀଲଙ୍କାର ହାମ୍ବନତୋଟା ବନ୍ଦରରେ ଏହି ଜାହାଜ ପହଞ୍ଚିଛି। ତେବେ ଚୀନର ଏହି ଜାହାଜକୁ ଶ୍ରୀଲଙ୍କା ପୂର୍ବରୁ ହିଁ ଅନୁମତି ଦେଇସାରିଛି।

ଖବର ଅନୁଯାୟୀ, ଭାରତ ଏବଂ ଆମେରିକାର ଚିନ୍ତା ମଧ୍ୟରେ ଶ୍ରୀଲଙ୍କା ଚୀନର ଜାହାଜକୁ ସ୍ଥଗିତ ରଖିବାକୁ ପୂର୍ବରୁ କହିଥିଲା । କିନ୍ତୁ କିଛି ଦିନ ପରେ ଶ୍ରୀଲଙ୍କା ନିଜ କଥାରୁ ଓହରି ଯାଇଥିଲା। ଆଉ ଚୀନର ଏହି ଗୁଇନ୍ଦା ଜାହାଜ ୱାନ ୱାଙ୍ଗ-୫କୁ ତାଙ୍କ ବନ୍ଦରରେ ପହଞ୍ଚିବାକୁ ଅନୁମତି ଦେଇଥିଲା। ତେବେ ଶ୍ରୀଲଙ୍କାରେ ପହଞ୍ଚିବା ପରେ ଚୀନର ଏହି ଗୁଇନ୍ଦା ଜାହାଜର ଟ୍ରାକିଂ ସିଷ୍ଟମ ଅନେକ ଭାରତୀୟ ସଂସ୍ଥାର ତଥ୍ୟ ନେବାକୁ ଗୁପ୍ତଚର ଭାବେ ଚେଷ୍ଟା କରିବ ବୋଲି ନୂଆଦିଲ୍ଲୀ ଚିନ୍ତା କରୁଛି।

ୟୁଆନ୍ ୱାଙ୍ଗ-୫ ଏକ ଗୁପ୍ତଚର ଜାହାଜ 

ଏକ ଗୁପ୍ତଚର ଜାହାଜ ଭାବରେ ମନୋନୀତ ହୋଇଥିବା ୟୁଆନ୍ ୱାଙ୍ଗ ୫, ୨୦୦୭ ରେ ନିର୍ମିତ ହୋଇଥିଲା ଏବଂ ଏହାର କ୍ଷମତା ୧୧,୦୦୦ ଟନ୍ ଅଟେ । ଏହି ଜାହାଜ ୧୩ ଜୁଲାଇରେ ଚାଇନାର ଜିଆଙ୍ଗିନ୍ ଛାଡି ବର୍ତ୍ତମାନ ତାଇୱାନ ନିକଟରେ ରହିଛି।  ମେରାଇନ୍ ଟ୍ରାଫିକ୍ ୱେବସାଇଟ୍ ଅନୁଯାୟୀ ଏହି ଜାହାଜଟି ଦକ୍ଷିଣ ଜାପାନ ଏବଂ ତାଇୱାନର ଉତ୍ତର-ପୂର୍ବ ମଧ୍ୟରେ ପୂର୍ବ ଚୀନ୍ ସାଗରରେ ଅଛି।

ଏହି ଜାହାଜ ମହାକାଶ ଏବଂ ଉପଗ୍ରହ ଟ୍ରାକିଂରେ ପାରଦର୍ଶୀ ହୋଇଛି। ୟୁଆନ୍ ୱାଙ୍ଗ ଶ୍ରେଣୀ ଜାହାଜ ମାଧ୍ୟମରେ ଚାଇନା ଉପଗ୍ରହ, ରକେଟ୍ ଏବଂ ଇଣ୍ଟରକଣ୍ଟିନେଣ୍ଟାଲ୍ ବାଲିଷ୍ଟିକ୍ ମିସାଇଲ୍ (ଆଇସିବିଏମ୍) ର ଉତକ୍ଷେପଣ କେନ୍ଦ୍ର ଉପରେ ନଜର ରଖିଛି। ଚାଇନାରେ ଏପରି ୭ଟି ଜାହାଜ ଅଛି, ଯାହା ସମଗ୍ର ପ୍ରଶାନ୍ତ, ଆଟଲାଣ୍ଟିକ୍ ଏବଂ ଭାରତ ମହାସାଗରରେ କାର୍ୟ୍ୟ କରିବାକୁ ସକ୍ଷମ। ଏହି ଜାହାଜଗୁଡ଼ିକ ଗୁପ୍ତଚର କରନ୍ତି ଏବଂ ବେଜିଂର ସ୍ଥଳ-ଆଧାରିତ ଟ୍ରାକିଂ ଷ୍ଟେସନକୁ ସମ୍ପୂର୍ଣ୍ଣ ସୂଚନା ପଠାଇଥାନ୍ତି।

ଆମେରିକାର ପ୍ରତିରକ୍ଷା ବିଭାଗର ରିପୋର୍ଟ ଅନୁଯାୟୀ, ଏହି ଜାହାଜଟି ପିଏଲଏର ଷ୍ଟ୍ରାଟେଜିକ୍ ସପୋର୍ଟ ଫୋର୍ସ (ssf) ଦ୍ୱାରା ପରିଚାଳିତ। SSF ହେଉଛି ଏକ ଥିଏଟର କମାଣ୍ଡ ସ୍ତରର ସଂଗଠନ। ଏହା ସ୍ପେସ୍, ସାଇବର, ଇଲେକ୍ଟ୍ରୋନିକ୍, ସୂଚନା, ଯୋଗାଯୋଗ ଏବଂ ମାନସିକ ଯୁଦ୍ଧ ମିଶନରେ PLAକୁ ସାହାଯ୍ୟ କରେ। ଏହାପୂର୍ବରୁ, ଯେତେବେଳେ ଚୀନ୍ ୨୦୨୨ରେ ଲଙ୍ଗ ମାର୍ଚ୍ଚ ୫ ବି ରକେଟ୍ ଉତକ୍ଷେପଣ କରିଥିଲା, ସେତେବେଳେ ଏହିଜାହାଜ ନୀରିକ୍ଷଣରେ ବାହାରିଥିଲା। ସମ୍ପ୍ରତି ଏହା ଚାଇନାର ଟିଆଙ୍ଗୋଗ ସ୍ପେସ୍ ଷ୍ଟେସନର ପ୍ରଥମ ଲ୍ୟାବ୍ ମଡ୍ୟୁଲ୍ ଉତକ୍ଷେପଣର ସାମୁଦ୍ରିକ ନୀରିକ୍ଷଣରେ ମଧ୍ୟ ଜଡିତ ଥିଲା।

 

Leave a comment