ନୂଆଦିଲ୍ଲୀ : ଆଜି ଉପସ୍ଥାପିତ ହୋଇଛି ସାଧାରଣ ବଜେଟ । ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୩-୨୪ ବଜେଟ ଉପସ୍ଥାପନ କରିଛନ୍ତି। ଚଳିତ ବଜେଟରେ ରେଳବାଇ ପାଇଁ ବଡ଼ ଘୋଷଣା କରାଯାଇଛି। ରେଲୱେ ପାଇଁ ୨.୪୦ ଲକ୍ଷ କୋଟି ଟଙ୍କାର ବଜେଟ ଘୋଷଣା କରାଯାଇଛି । ରେଳବାଇ ପାଇଁ ଚଳିତ ବର୍ଷ ରେକର୍ଡ ୨.୪୦ ଲକ୍ଷ କୋଟି ଟଙ୍କାର ବ୍ୟୟବରାଦ କରାଯାଇଛି। ଏଯାଏ ଏତେ ପରିମାଣରୁ ପୁଞ୍ଜି କେବେ ହେଲେ ରେଳବାଇ ପାଇଁ ଘୋଷଣା ହୋଇ ନଥିଲା ୨୦୧୩-୧୪ ରେଳବାଇ ବଜେଟ୍ର ବ୍ୟୟବରାଦର ଚଳିତ ରେଳବାଇ ବଜେଟ୍ ୯ଗୁଣ।
ଚଳିତ ବଜେଟ୍ରେ ରେଳବାଇକୁ ସର୍ବାଧିକ ଟଙ୍କାର ବ୍ୟୟବରାଦ କରିବାର କାରଣ ହେଉଛି ସରକାର ଅନେକ ନୂଆ ଟ୍ରେନ ଓ ରେଳ ଲାଇନ ଆରମ୍ଭ କରାଯିବାକୁ ଲକ୍ଷ୍ୟ ରଖିଛନ୍ତି। ପିଏମ ଗତି ଶକ୍ତି ଓ ନ୍ୟାଶନାଲ ଲଜିଷ୍ଟିକ ନୀତି ଦ୍ୱାରା ଭାରତୀୟ ରେଳବାଇ ତା’ର ସେବାକୁ ତ୍ୱାରାନ୍ୱିତ କରୁଛି।
ସେହିପରି, ‘ବନ୍ଦେ ଭାରତ ଟ୍ରେନ୍’ ଉପରେ ଚଳିତ ବଜେଟ୍ ଅଧିକ ଧ୍ୟାନ ଦେବ। ୨୦୨୩ ଅଗଷ୍ଟ ସୁଦ୍ଧା ୭୫ଟି ‘ବନ୍ଦେ ଭାରତ ଟ୍ରେନ୍’ ଚଳାଇବା ପାଇଁ ଭାରତୀୟ ରେଳବାଇ ବ୍ୟବସ୍ଥା କରିଛି। ଖୁବ୍ ଶୀଘ୍ର ୨୦୦ ‘ବନ୍ଦେ ଭାରତ ସ୍ଲିପର୍ ଟ୍ରେନ୍’ ନିର୍ମାଣ କରିବା ପାଇଁ ଟେଣ୍ଡର୍ ଦିଆଯିବ। ଏହାଛଡ଼ା, ଚଳିତ ବଜେଟ୍ରେ ୪୦୦ରୁ ୫୦୦ ‘ସେମି-ହାଇସ୍ପିଡ୍’ ବନ୍ଦେ ଭାରତ ଟ୍ରେନ୍ ଚଳାଚଳ ପାଇଁ ଘୋଷଣା କରାଯିବ।
ଭାରତୀୟ ରେଳବାଇର ଏକ ପ୍ରମୁଖ ବିକାଶ ହେଉଛି ଭାରତର ପ୍ରଥମ ସେମି ହାଇ ସ୍ପିଡ୍ ଟ୍ରେନ୍ “ବନ୍ଦେ ଭାରତ ଏକ୍ସପ୍ରେସ” ର ଶୁଭାରମ୍ଭ । ଘଣ୍ଟା ପ୍ରତି ୧୬୦ କିଲୋମିଟର ବେଗରେ ପହଞ୍ଚିବାକୁ ସକ୍ଷମ ଏହି ଟ୍ରେନ୍ ଭାରତୀୟ ରେଳବାଇର ଇଣ୍ଟିଗ୍ରାଲ୍ କୋଚ୍ କାରଖାନା ଦ୍ୱାରା ସ୍ୱଦେଶୀ ଭାବରେ ନିର୍ମିତ ହୋଇଛି। ଏଥିରେ ଅନବୋର୍ଡ ୱାଇ-ଫାଇ, ଜିପିଏସ୍ ଆଧାରିତ ଯାତ୍ରୀ ସୂଚନା ପ୍ରଣାଳୀ ଏବଂ ସିସିଟିଭି କ୍ୟାମେରା ଭଳି ଅନେକ ଆଧୁନିକ ସୁବିଧା ରହିଛି।
ଅନ୍ୟ ଏକ ପ୍ରମୁଖ ବିକାଶ ହେଉଛି ସୁରକ୍ଷା ଏବଂ ଦକ୍ଷତା ବୃଦ୍ଧି ପାଇଁ ଟେକ୍ନୋଲୋଜିର ବ୍ୟବହାର ବୃଦ୍ଧି ଉପରେ ଭାରତୀୟ ରେଳବାଇର ଧ୍ୟାନ । ଟ୍ରେନ୍ ଏବଂ ଷ୍ଟେସନରେ ସିସିଟିଭି କ୍ୟାମେରା ବ୍ୟବହାର, ଟ୍ରେନ୍ ଧକ୍କା ରୋକିବା ପାଇଁ ଅଟୋମେଟିକ୍ ଟ୍ରେନ୍ ପ୍ରୋଟେକ୍ସନ୍ (ଏଟିପି) ସିଷ୍ଟମର ପ୍ରୟୋଗ ଏବଂ ଟ୍ରେନର ରିଅଲ୍ ଟାଇମ୍ ଟ୍ରାକିଂ ପାଇଁ ଜିପିଏସ୍ ଆଧାରିତ ସିଷ୍ଟମର ବ୍ୟବହାର ଅନ୍ତର୍ଭୁକ୍ତ ।
