ନୂଆଦିଲ୍ଲୀ: ଗଲୱାନ ଘାଟିରେ ଦିର୍ଘ ଦିନ ଧରି ଚାଲି ଆସୁଥିବା ସଂଘର୍ଷରେ ଏବେ ପୂର୍ଣ୍ଣଛେଦ ପଡିବାକୁ ଯାଉଛି । ପାଙ୍ଗୋଙ୍ଗ୍ରୁ ଶେଷ ହୋଇଛି ସମ୍ପୂର୍ଣ୍ଣ ସୈନ୍ୟ ପ୍ରତ୍ୟାହାର ପ୍ରକ୍ରିୟା । ଉଭୟ ଭାରତ ଓ ଚୀନ ନିଜ ନିଜ ସୈନ୍ୟଙ୍କୁ ପଛକୁ ହଟାଇ ଦେଇଛନ୍ତି ।
ସେନା ସୂତ୍ରରୁ ସୂଚନା ଅନୁଯାୟୀ, ପାଙ୍ଗୋଙ୍ଗ୍ ହ୍ରଦର ଉତ୍ତର ଓ ପୂର୍ବ କୂଳରୁ ସୈନ୍ୟ ପ୍ରତ୍ୟାହାର ପ୍ରକ୍ରିୟା ସମ୍ପୂର୍ଣ୍ଣ ଶେଷ ହୋଇଛି । ସୈନ୍ୟ ପ୍ରତ୍ୟାହାର ପରେ ଭାରତୀୟ ଯବାନ ନିଜର ଯଥାପୂର୍ବ ସ୍ଥାନକୁ ଫେରି ଆସିଛନ୍ତି । ତେବେ ପୂର୍ବରୁ ନିର୍ଦ୍ଧାରିତ ଚୁକ୍ତି ଅନୁଯାୟୀ ଚୀନ ଓ ଭାରତ ମଧ୍ୟରେ ଶନିବାର କର୍ପସ କମାଣ୍ଡରସ୍ତରୀୟ ବୈଠକ ବସିବ । ଉଭୟ ପକ୍ଷ ଲଦାଖର ୩ଟି ସ୍ଥାନରୁ ସୈନ୍ୟ ପ୍ରତ୍ୟାହାର ନେଇ ଆଲୋଚନା କରିପାରନ୍ତି ।
୧୧ ଫେବୃଆରୀରେ ଉଭୟ ଚୀନ ଓ ଭାରତ ସୈନ୍ୟ ପ୍ରତ୍ୟାହାର ପ୍ରକ୍ରିୟା ଆରମ୍ଭ କରିଥିଲେ । ଏନେଇ ବଜେଟ ଅଧିବେଶନ ସମୟରେ ରାଜ୍ୟସଭାରେ ସୂଚନା ଦେଇଥିଲେ ପ୍ରତିରକ୍ଷାମନ୍ତ୍ରୀ ରଜନାଥ ସିଂହ । ସୈନ୍ୟ ପ୍ରତ୍ୟାହାରର ସମୟର ଭିଡିଓ ମଧ୍ୟ ସାମ୍ନାକୁ ଆସିଥିଲା ।
ପ୍ରତିରକ୍ଷାମନ୍ତ୍ରୀ ରାଜନାଥ ସିଂହ କହିଥିଲେ ଯେ ପୋଙ୍ଗୟାଙ୍ଗ ହ୍ରଦର ଉତ୍ତର ଓ ଦକ୍ଷିଣ କୂଳରେ ଉଭୟ ପକ୍ଷ ସୈନ୍ୟ ପ୍ରତ୍ୟାହାର କରିବେ । ଚୀନ ଉତ୍ତରକୂଳର ଫିଙ୍ଗର ୮ରୁ ପୂର୍ବକୁ ଯିବା ବେଳେ ଭାରତୀୟ ଫିଙ୍ଗର ୩ ପାଖରେ ଥିବା ମେଜର ଧ୍ୟାନସିଂହ ଥାପ୍ପା ପୋଷ୍ଟ ପାଖକୁ ଆସିବେ ।
ପାଙ୍ଗୋଙ୍ଗ ହ୍ରଦକୁ ନେଇ ହୋଇଥିବା ଚୁକ୍ତି ଆଧାରରେ ଚୀନ ନିଜ ସେନାକୁ ଫିଙ୍ଗର ୮ରୁ ପୂର୍ବ ଆଡକୁ ରଖିବ । ଏହିପରି ଭାରତ ମଧ୍ୟ ନିଜ ସେନାକୁ ଫିଙ୍ଗର ୩ ପାଖରେ ସ୍ଥାୟୀ ବେସ୍ରେ ରଖିବ । ତେବେ ସମ୍ପୂର୍ଣ୍ଣ ସୈନ୍ୟ ପ୍ରତ୍ୟାହାରର ୪୮ ଘଣ୍ଟା ଭିତରେ ଉଭୟ ଦେଶର କମାଣ୍ଡର ସ୍ତରୀୟ ବୈଠକ ବସିବ ବୋଲି କୁହାଯାଇଥିଲା ।
