ତୀରନ୍ଦାଜ ବିଶ୍ୱକପରେ ମେକ୍ସିକୋକୁ ହରାଇ ଭାରତୀୟ ମହିଳା ଟିମ ଜିତିଲା ସ୍ୱର୍ଣ୍ଣ
ଭାରତୀୟ ମହିଳା ଟିମ୍ ରବିବାର ଦିନ ତୀରନ୍ଦାଜ ବିଶ୍ୱକପର ତୃତୀୟ ପର୍ଯ୍ୟାୟରେ ମେକ୍ସିକୋକୁ ହରାଇ ସ୍ୱର୍ଣ୍ଣପଦକ ହାସଲ କରିଛି । ଫାଇନାଲରେ ଭାରତ ମେକ୍ସିକୋକୁ ୫-୧ ରେ ହରାଇଛି । ଭାରତୀୟ ଟିମରେ ଦୀପିକା କୁମାରୀ, ଅଙ୍କିତା ଭକତ ଓ କୋମାଲିକା ବାରି ସାମିଲ ଥିଲେ । ଭାରତକୁ ସ୍ୱର୍ଣ୍ଣ ପଦକ ବିଜେତା କରିଥିବା ଏହି ୩ ଜଣ ଯାକ ଖେଳାଳୀ ଝାରଖଣ୍ଡ ରାଜ୍ୟର ।
ଫାଇନାଲରେ ଅତି ସୁନ୍ଦର ଓ କୌଶଳପୂର୍ଣ୍ଣ ଖେଳ ଖେଳିଥିଲା ଭାରତୀୟ ଟିମ୍ । ପ୍ରଥମ ସେଟ୍ ରେ ସ୍କୋର ୫୭-୫୭ ରହିଥିଲା । ଦ୍ୱିତୀୟ ସେଟରେ ଭଲ ପ୍ରଦର୍ଶନ କରି ଭାରତୀୟ ଟିମ୍ ମେକ୍ସିକୋ ଉପରେ ଚାପ ପକାଇଥିଲା । ଦ୍ୱିତୀୟ ସେଟରେ ମେକ୍ସିକୋ ୫୨ ପଏଣ୍ଟ ହାସଲ କରିଥିଲା ଫଳରେ ଭାରତୀୟ ଟିମ୍ ୩ ପଏଣ୍ଟ ଆଗକୁ ଯାଇଥିଲା । ଭାରତୀୟ ଟିମ୍ ୩-୧ ରେ ଆଗରେ ଥାଇ ତୃତୀୟ ସେଟରେ ବି ଭଲ ପ୍ରଦର୍ଶନ କରିଥିଲା । ତୃତୀୟ ସେଟରେ ୫୫ ପଏଣ୍ଟ ହାସଲ କରିଥିଲା । ହେଲେ ମେକ୍ସିକୋ ଟିମ୍ ଭାରତ ସମକକ୍ଷ ପ୍ରଦର୍ଶନ ନକରି ପାରି ପରାଜିତ ହୋଇଥିଲା ।