ବାୟୁସେନା ମୁଖ୍ୟଙ୍କ ଚେତାବନୀ : ଭାରତକୁ ଦୁଇପଟୁ ହୋଇପାରେ ଆକ୍ରମଣ
ନୂଆଦିଲ୍ଲୀ : ଚୀନ୍ ଏବଂ ପାକିସ୍ତାନ ଭଳି ଭାରତର ଦୁଇ ଶତ୍ରୁଙ୍କ ପ୍ରତି ଦେଶ ପ୍ରତି ବିପଦ ରହିଛି। ଦେଶର ଭୌଗୋଳିକ ସ୍ଥିତି ଏଭଳି ରହିଛି ଯେ, ଉଭୟ ରାଷ୍ଟ୍ର ପକ୍ଷରୁ କୌଣସି ସମୟରେ ବିପଦକୁ ଏଡାଇ ଦିଆଯାଇପାରିବନି। କିନ୍ତୁ ପରିବର୍ତ୍ତିିତ ସ୍ଥିତିରେ ଚୀନ୍ ଏବଂ ପାକିସ୍ତାନ ଦୁଇ ପଟରୁ ଏକାବେଳକେ ଭାରତ ଉପରେ ଆକ୍ରମଣ କରିପାରନ୍ତି ବୋଲି ବାୟୁସେନା ମୁଖ୍ୟ ଭି ଆର ଚୌଧୁରୀ ଚେତାବନୀ ଜାରି କରିଛନ୍ତି। ପିଟିଆଇକୁ ଏକ ସ୍ବତନ୍ତ୍ର ସାକ୍ଷାତକାର ଦେବା ଅବସରରେ ସେ କହିଛନ୍ତି ଯେ, ଭାରତର ପଶ୍ଚିମ ଏବଂ ଉତ୍ତର ପଟୁ ସବୁବେଳେ ବିପଦ ରହିଛି।
କୌଣସି ସମୟରେ ଏହି ଦୁଇ ଶତ୍ରୁ ରାଷ୍ଟ୍ର ଆମ ଉପରେ ଆକ୍ରମଣ କରିବାର ସମ୍ଭାବନା ମଧ୍ୟ ବଢିଛି। ତେଣୁ ଭାରତକୁ ଏଦିଗରୁ ସମ୍ପୂର୍ଣ୍ଣ ପ୍ରସ୍ତୁତ ରହିବାକୁ ପଡ଼ିବ ବୋଲି ସେ କହିଛନ୍ତି। ୟୁକ୍ରେନ-ରୁଷ ଯୁଦ୍ଧ ବ୍ୟତୀତ ବର୍ତ୍ତମାନ ବୈଶ୍ବିକ ସ୍ତରରେ ଘଟୁଥିବା ପରିବର୍ତ୍ତନକୁ ନେଇ ଚୀନ୍ ଏବେ ନିଜ ଆଭିମୁଖ୍ୟରେ ପରିବର୍ତ୍ତନ ଆଣିଛି। ସେହିପରି ପାକିସ୍ତାନର ଆଭ୍ୟନ୍ତରୀଣ ସମସ୍ୟା ମଧ୍ୟ ଦିନକୁ ଦିନ ବେହାଲ ହେବାରେ ଲାଗିଛି। ଉଭୟ ରାଷ୍ଟ୍ର ଭାରତକୁ ଟାର୍ଗେଟ କରିଥିଲା ବେେଳ କୌଣସି ସମୟରେ ଭାରତ ବିରୋଧରେ ଏକାଠି ହୋଇପାରନ୍ତି ବୋଲି ଏୟାର ଚିଫ ମାର୍ଶାଲ ଚୌଧୁରୀ କହିଛନ୍ତି।
ସୀମା ବିବାଦକୁ ନେଇ ଭାରତ ଚୀନ ମଧ୍ୟରେ ବାରମ୍ବାର ଆଲୋଚନା ହୋଇସାରିଛି। ହେଲେ ବର୍ତ୍ତମାନ ସୁଦ୍ଧା କୌଣସି ନିଷ୍କର୍ଷ ବାହାରିପାରି ନାହିଁ। ବରଂ ସ୍ଥିତି ଦିନକୁ ଦିନ ବିଗିଡିବାରେ ଲାଗିଛି। ବିଶେଷକରି ଚୀନ୍ର ଦୋମୁହାଁ ନୀତିକୁ ନେଇ ସୀମାରେ ସ୍ବାଭାବିକତା ଫେରିବା ସମ୍ଭବ ହେଉ ନାହିଁ। ଚୀନ ଗୋଟିଏ ପଟରେ ଶାନ୍ତିର କଥା କହୁଥିବା ବେଳେ ଅନ୍ୟପଟେ ସୀମାରେ ସୈନ୍ୟ ଠୁଳ କରିବା ସହିତ ନିର୍ମାଣ କାର୍ଯ୍ୟ ଚଳାଇଛି। ତେଣୁ ଆମକୁ ମଧ୍ୟ ତଦନୁପାତିକ ପ୍ରସ୍ତୁତ ରହିବାକୁ ପଡ଼ିବ ବୋଲି ସେ କହିଛନ୍ତି।