ରୋଷେଇ ଗ୍ୟାସରୁ ନିଆଁ ବାହାରି ଜଳିଗଲା ବାଇକ୍‌, ୩ ଆହତ

ମହାକାଳପଡା: ମହାକାଳପଡା ବ୍ଲକ ଟିକରପଙ୍ଗା ପଞ୍ଚାୟତ ଗତାନଈ ଗ୍ରାମରେ ସୋମବାର ରୋଷେଇ ଗ୍ୟାସରୁ ନିଆଁ ଲାଗି ଗୋଟିଏ ବାଇକ ଜଳିଯାଇଛି। ରୋଷେଇ ଘରେ ଗ୍ୟାସ ଟାଙ୍କିରେ ଲାଗିଥିବା ନିଆଁକୁ ଆୟତ କରିବାକୁ ଚେଷ୍ଟା କରି ୩ଜଣ ଆହତ ହୋଇ କେନ୍ଦ୍ରାପଡା ଜି୍‌ଲା ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି ହୋଇଛନ୍ତି । ଗତାନଈ ଗ୍ରାମର ମାନସ ନାୟକଙ୍କ ଘରେ ରୋଷେଇ ଚାଲୁଥିବା ସମୟରେ ଗ୍ୟାସ ଲିକ୍ ହୋଇ ନିଆଁ ଲାଗିଯାଇଥିଲା ।ଗ୍ୟାସ୍ ଟାଙ୍କି ପର୍ଯ୍ଯନ୍ତ ନିଆଁ ଲାଗି ଘର ଭିତରେ ହୁତ୍ ହୁତ୍ ହୋଇ ଜଳି ଉଠିଥିଲା। ଏଥିରେ ଦେବକୀ ନାୟକ, ରେବତୀ ନାୟକ ଏବଂ ପୁଅ ସୋନୁ ନାୟକ ଆହତ ହୋଇଛନ୍ତି। ରୋଷେଇ ଘର ପାଖରେ ରହିଥିବା ରବି ନାୟକଙ୍କ ଏକ ବାଇକ ନିଆଁର କବଳକୁ ଆସି ପୋଡିଯାଇଛି । ଖବର ପାଇ ମାର୍ଶାଘାଇ ଅଗ୍ନିଶମ ସେବା କେନ୍ଦ୍ରର ଅଧିକାରୀ ଅଜୟ କୁମାର ମୁଦୁଲିଙ୍କ ନେତୃତ୍ୱରେ କର୍ମଚାରୀମାନେ ପହଞ୍ଚି ରୋଷେଇ ଘରୁ ଜଳନ୍ତା ଗ୍ୟାସ ଟାଙ୍କିକୁ ଉଦ୍ଧାର କରି ନିଆଁକୁ ଲିଭାଇଥିଲେ। ଅଗ୍ନିକାଣ୍ଡ ସମୟରେ ମାନସଙ୍କର ଦୁଇହାତ ଓ ପାଦ ପୋଡିହୋଇ ଯାଇଥିଲା । ରେବତୀଙ୍କର ହାତ ଏବଂ ଗୋଡ ପୋଡିଯିବା ସହିତ ମୁହଁରେ ଗ୍ୟାସ ନିଆଁ ଧାସରେ ମୁହଁ, କାନ, ନାକ ଫୁଲି ଯାଇଛି। ମାନସଙ୍କ ସ୍ତ୍ରୀ ଦେବକୀଙ୍କ ସହିତ ସାନପୁଅ ନିଆଁ ଧାସରେ ସାମାନ୍ୟ ଆହାତ ହୋଇଛନ୍ତି। ମାନସଙ୍କ ଘରର କବାଟ, ଖଟ ସହିତ ଗୋଟିଏ ମଟର ସାଇକେଲ ସମ୍ପୂର୍ଣ୍ଣ ପୋଡି ଯାଇଛି।

Leave a comment